«قالانىڭ ءارتۇرلى اۋداندارىنداعى نارازىلىق بىلدىرۋشىلەردىڭ كوپتەگەن توپتارى پاترۋلدىك پوليتسيا وكىلدەرىنە شابۋىل جاسادى. ولار 7 قارۋ- جاراق دۇكەنىن باسىپ الىپ، قارۋ- جاراق پەن وق- دارىلەردى يەمدەنگەن. ءتىپتى قوعامدىق كولىكتى، كوممۋنالدىق تەحنيكانى باسىپ الىپ، قۇقىق قورعاۋ كۇشتەرىنىڭ جاساقتارى تارالىپ، قىزمەتكەرلەرگە قولدان جاسالعان جانعىش قوسپالار لاقتىرىپ، وق جاۋدىردى. قىزمەتتىك اۆتوكولىكتەردى، سونىڭ ىشىندە ءورت ءسوندىرۋ ماشينالارىن ورتەدى»، - دەدى ءمينيستردىڭ مىندەتىن اتقارۋشى.
سونىمەن قاتار، ول زارداپ شەككەندەرگە مەديتسينالىق كومەك كورسەتۋ ءۇشىن جانجال بولعان جەرگە كەلگەن جەدەل جاردەم كولىكتەرىنە كەدەرگى جاساعانىن ايتتى.
«وسىدان كەيىن قالالىق اكىمدىك عيماراتى مەن تەلەارنالارعا بىرنەشە رەت شابۋىل ۇيىمداستىرىلدى. «5-قاڭتاردا الماتى قالاسىنىڭ بارلىق شەت ايماقتارىنان ءبىر ۋاقىتتا قالا ورتالىعىنا الاڭعا كەلگەن 20 مىڭعا جۋىق ادام جينالىپ، اكىمدىك عيماراتىن باسىپ الۋعا ارەكەت جاسادى. سونىمەن بىرگە ولار جاقسى قارۋلانعان جانە ۇيىمداستىرىلعان. سان باسىمدىعىنا بايلانىستى ولار بىرنەشە قورعانىس بەلدەۋىن بۇزىپ ءوتىپ، عيماراتقا كىردى. كەزدەيسوق قۇربانداردىڭ الدىن الۋ ءۇشىن پوليتسيا شەگىنۋگە ءماجبۇر بولدى. سونىمەن بىرگە مۇلىك جويىلىپ، تونالدى، عيماراتتار ورتەندى. پوليتسيا قىزمەتكەرلەرى مەن اسكەري ۋچيليشەنىڭ كۋرسانتتارى سوققىعا جىعىلىپ، ولاردىڭ ارنايى قۇرالدارى مەن نىساندى كيىم- كەشەكتەرى تارتىپ الىندى. سونىمەن بىرگە قارۋلى قىلمىسكەرلەر قالا كوشەلەرىندە بەتالدى وق جاۋدىرىپ، پوليتسيا قىزمەتكەرلەرىن، اسكەري قىزمەتشىلەردى جانە جاي ءوتىپ بارا جاتقان ادامداردى ءولتىردى»، - دەدى ەرلان تۇرعىمبايەۆ.
ونىڭ مالىمەتى بويىنشا، قالاداعى اۋەجايدى باسىپ الۋعا 800 ادام قاتىسقان.
«800 گە جۋىق قىلمىسكەر حالىقارالىق اۋەجايدى باسىپ الدى. سالدارىنان ۇشىپ كەتۋگە ءتيىس 60 رەيس پەن ۇشىپ كەلۋگە ءتيىس 56 رەيس توقتاتىلدى. بۇل كولىك كوللاپسىن تۋىنداتىپ، الماتى قالاسىندا جولاۋشىلار ءۇشىن ۇلكەن پروبلەمالار تۋىندادى. اۋەجاي عيماراتىنداعى بارلىق ساۋدا دۇڭگىرشەكتەرى مەن دۇكەندەر، كاسسالار تونالدى. سونىمەن قاتار، نارازىلىق بىلدىرۋشىلەر بارلىق جەردە كاسىبي داعدىلارى بار ەكەنىن كورسەتتى. ولاردىڭ ءىس- ارەكەتتەرىندە ءتارتىپ پەن ۇيىمشىلدىق بايقالادى. جۇرگەن جەرلەرىندە جانە شابۋىل الدىندا بەينەباقىلاۋ كامەرالارىن ىستەن شىعارىپ وتىرعان. جولدارعا توسقاۋىل مەن باقىلاۋشىلار قويىلدى. ءوز ارەكەتتەرىن ۇيلەستىرۋ ءۇشىن راديوستانتسيالاردى قولداندى»، - دەدى ءمينيستردىڭ مىندەتىن اتقارۋشى.