تەلەساباققا تەلمىرگەن 800 مىڭ وقۋشى: قاشىقتان وقۋدىڭ العاشقى اپتاسى قالاي ءوتتى

نۇر-سۇلتان. قازاقپارات - ءبىلىم جانە عىلىم ۆيتسە-ءمينيسترى شولپان قارينوۆا قازاقستانداعى وقۋشىلاردى قاشىقتان وقىتۋ جۇيەسىنىڭ العاشقى اپتاسىن قورىتىندىلادى، دەپ حابارلايدى قازاقپارات ءتىلشىسى.

«قاشىقتان وقىتۋ بويىنشا ءبىرىنشى اپتا اياقتالدى. قازىر قاشىقتان وقىتۋ جۇيەسى بىرنەشە فورماتتا ءوتىپ جاتىر. كەيىنگى بەس كۇننىڭ قورىتىندىسىن قارايتىن بولساق، ەلىمىزدە «كۇندەلىك» ەلەكتروندى پورتالى، «ءبىلىملەند» جۇيەسى، ونلاين جۇيە دە، باسقا دا بىرنەشە سيفرلىق رەسۋرس ۇسىنىلعان ەدى. قازىر ءبىز ەلەكتروندىق جۇيەنىڭ قانشالىقتى پايداعا جاراپ وتىرعانىن كورىپ وتىرمىز. 2 ميلليوننان استام وقۋشى ءارتۇرلى جاعدايدا ينتەرنەتتى قولدانا ءبىلدى. العاشقى كۇندەرى «كۇندەلىك» جۇيەسىنىڭ دۇرىس جۇمىس ىستەمەگەنىن كوردىك.

ءبىراق سول كۇننىڭ سوڭىنا قاراي پروبلەمانىڭ ءبارى شەشىمى تاۋىپ، «كۇندەلىك» ەكىنشى كۇننەن باستاپ جاقسى جۇمىس ىستەي باستادى»، - دەدى شولپان قارينوۆا مينيسترلىكتىڭ ونلاين رەجيمدە وتكەن قاشىقتان وقىتۋدىڭ ارالىق كورسەتكىشتەرى تۋرالى بريفينگىندە.

ءبىلىم جانە عىلىم ۆيتسە-ءمينيسترىنىڭ ايتۋىنا قاراعاندا، بۇگىنگى كۇنى ينتەرنەتى ءالسىز نەمەسە مۇلدە جوق وڭىرلەردە 800 مىڭنان استام وقۋشى تەلەساباق كورىپ وتىر.

«قازاقستان بويىنشا 454 مەكتەپ شتاتتىق رەجيمدە جۇمىس ىستەپ جاتىر. ونىڭ ىشىندە 25 مىڭنان استام وقۋشى بار. ولاردىڭ بۇرىنعىداي شتاتتىق رەجيمدە جۇمىس ىستەپ جاتقانىن كورىپ وتىرمىز. ينتەرنەت جەلىسى جوق 57 ەلدىمەكەندەگى 4 مىڭعا جۋىق بالا پوشتا بايلانىسى ارقىلى وقۋلارىن وقۋدا. قازاقستاندا جالپى وسىنداي وقۋ فورماتىمەن قاشىقتان وقىتۋدىڭ ءبىرىنشى اپتاسى اياقتالدى»، - دەدى ول.