الماتىدا «ۇلى دالا ازاماتتارى» اۆتوشەرۋىنە قاتىسۋشىلاردى قارسى الۋعا 800 دەن استام ادام قاتىستى - فوتو
ق ر تاۋەلسىزدىگىنىڭ 25 جىلدىعى مەن قازاقستاندىقتاردىڭ ۇلى وتان سوعىسىندا كورسەتكەن ەرلىكتەرىنە 75 جىل تولۋىنا ارنالعان بۇل اۆتوشەرۋ بيىل 4- شىلدە كۇنى الماتىدا جولعا شىققان بولاتىن.
وعان قاتىسۋشىلار - قازاقستان حالقى اسسامبلەياسىنىڭ الماتى قالاسى بويىنشا فيليالى، «گەنەرالدار كەڭەسى» ر ق ب مۇشەلەرى، «حالىق قاھارمانى» دميتري رودين، گەنەرال پانفيلوۆتىڭ نەمەرەسى الۋا بايقاداموۆا، اۋعان سوعىسىنىڭ ارداگەرلەرى، پانفيلوۆ گۆارديالىق ديۆيزياسى قۇرامىندا شايقاسقان جاۋىنگەرلەردىڭ ۇرپاقتارى جانە جۋرناليستەر - بارلىعى 40 قا جۋىق ادام اۆتوبۋسپەن بىشكەك، تاراز، شىمكەنت، قىزىلوردا، قوستاناي، پەتروپاۆل، كوكشەتاۋ، استانا، سەمەي جانە باسقا دا قالالاردا بولىپ قايتتى.
بۇل قالالاردا اۆتوشەرۋگە قاتىسۋشىلار ۇ و س ارداگەرلەرىمەن، جەرگىلىكتى تۇرعىندارمەن كەزدەسىپ، سول قالالاردا قۇرىلعان اسكەري قۇرامالار جايىندا، سولاردىڭ قۇرامىندا جاۋمەن شايقاسىپ، ەرلىك كورسەتكەن باتىرلارىمىز جايىندا اڭگىمەلەدى. باستى ماقسات - جەرگىلىكتى تۇرعىنداردىڭ، اسىرەسە جاستاردىڭ بويىندا وتانعا دەگەن پاتريوتتىق سەزىمدى وياتۋ. ولاردى اسكەري-پاتريوتتىق رۋحتا تاربيەلەۋ جانە «ماڭگىلىك ەل» پاتريوتتىق اكتىسىن جۇزەگە اسىرۋعا شاقىرۋ بولدى.
بۇگىنگى شارا بارىسىندا اۆتوشەرۋگە قاتىسۋشىلار جانە ولاردى قارسى الۋشى تۇلعالار ماڭگىلىك الاۋعا جانە ي. پانفيلوۆتىڭ ەسكەرتكىشىنە گۇل شوقتارىن قويىپ، اتا-بابالار رۋحىنا تاعزىم ەتتى.
ال الماتى گارنيزونىنىڭ جاۋىنگەرلەرى سالتاناتتى شاراعا قاتىسۋشىلار الدىنان سالتاناتتى ساپ قۇرىپ ءوتتى.
«بۇل اۆتوشەرۋدى ۇيىمداستىرۋداعى ماقسات - ۇلى وتان سوعىسىنا قاتىسقان اتا-بابالارىمىزدىڭ رۋحىنا تاعزىم ەتۋ جانە ولاردىڭ ەرلىكتەرىن دارىپتەۋ. وسىنداي شارالار ارقىلى ءبىز ولاردىڭ ەرلىكتەرىن ەستەن شىعارمايمىز جانە جاستاردى باتىرلارىمىزدىڭ ەرلىك ىستەرى مەن ءومىر جولىنان ۇلگى الۋعا شاقىرامىز»، - دەدى «گەنەرالدار كەڭەسى» رەسپۋبليكالىق قوعامدىق بىرلەستىگى ءتورالقاسىنىڭ ءتوراعاسى، ادىلەت گەنەرال-مايورى رۇستەم قايداروۆ.
اۆتوشەرۋگە قاتىسۋشىلاردى 800 دەن استام ادام قارسى الدى. ولاردىڭ اراسىندا ۇ و س ارداگەرلەرى، «نۇر وتان» پارتياسى، قازاقستان حالقى اسسامبلەياسى، الماتى قالاسى اكىمدىگى، الماتى قالاسى بويىنشا قورعانىس ىستەرى دەپارتامەنتى، الماتى قالالىق توتەنشە جاعدايلار جونىندەگى دەپارتامەنتى، «گەنەرالدار كەڭەسى» ر ق ب، اۋعان سوعىسىنىڭ ارداگەرلەرى، اسكەري كافەدرلاردىڭ كۋرسانتتارى جانە «جاس وتان» جاستار قاناتىنىڭ وكىلدەرى بولدى.