ب. كەنجەبولاتوۆا: 800 دەن استام تاستاندى بالا ءوز انالارىمەن قاۋىشتى
بۇل تۋرالى بۇگىن وكق باسپا ءسوز ءماسليحاتىندا «انالار ءۇيى» جوباسىنىڭ جەتەكشىسى باليا كەنجەبولاتوۆا ايتتى.
«مەن «اسىل بالا» قاۋىمداستىعى قۇرامىندا «انالار ءۇيى» ارنايى جوباسىن جۇرگىزىپ كەلەمىن. ءبىز وندا الەۋمەتتىك جەتىمدىكتىڭ الدىن الۋ شارۋالارىمەن اينالىسامىز. ەڭ ءبىرىنشى ءبىز اتا-انالاردىڭ ءوز بالالارىنان باس تارتۋ سەبەپتەرىن انىقتاۋعا نازار اۋدارۋدامىز. بۇگىندە ءبىزدىڭ اتقارعان جۇمىسىمىز - 800 دەن استام بالا جەتىمدەر ۇيىنە جىبەرىلمەي، اناسىمەن بىرگە «انالار ۇيىنە» الىندى»، - دەدى ب. كەنجەبولاتوۆا.
ونىڭ ايتۋىنشا، «انالار ءۇيى» جوباسى قازاقستاندا 2013 -جىلدىڭ مامىر ايىندا اشىلعان. بۇگىندە ەلىمىز بويىنشا وسىنداي 23 ءۇي جۇمىس ىستەپ تۇر. ولاردا بەلگىلى سەبەپتەرمەن ءوز بالاسىنان باس تارتقان جالعىزباستى انالار بالاسىمەن بىرگە قامقورلىققا الىنىپ، الەۋمەتتىك جانە پسيحولوگيالىق كومەك كورسەتىلىپ، ءوز بالاسىن ءوزى تاربيەلەۋىنە بارلىق مۇمكىندىك جاسالادى. وسىنىڭ ناتيجەسىندە پسيحولوگيالىق سترەستەن شىققان انالار ەندىگى جەردە ءبىر كەزدەرى تاستاپ كەتپەك بولعان بالالارىنسىز ءومىر سۇرە المايتىندارىن ۇعىنادى.
«ءبىزدىڭ باستى مىندەتىمىز - انالاردىڭ بالاسىنان نەلىكتەن باس تارتقانىن انىقتاۋ. جانە تاجىريبە كورسەتكەندەي، وسىنداي تاعدىر تاۋقىمەتىنە تۇسكەن انالارعا دەر كەزىندە قارجىلاي جانە پسيحولوگيالىق كومەك كورسەتۋ ارقىلى ولاردىڭ بالالارىنان باس تارتۋىنىڭ الدىن الىپ، كوزدەرى جاۋتاڭداعان كىشكەنتاي پەرىشتەلەردىڭ بالالار ۇيىنە ءتۇسۋىنىڭ جولىن كەسۋگە بولادى»، - دەيدى جوبا جەتەكشىسى.
ايتا كەتەيىك، سوڭعى ستاتيستيكالىق دەرەكتەر بويىنشا قازاقستاندا 5 ميلليونعا جۋىق بالا بار. ولاردىڭ 3-7 جاس ارالىعىنداعى 600000 نان استامى تۇرمىسى ناشار وتباسىلاردا تۇرسا، 33000-نان استامى - جەتىم.
اۆتور: ءابۋ-اسقار مەكەش ۇلى