قازاقستاننىڭ سولتۇستىگىندە 800 مىڭ گەكتار جەر سەپتوريوز اۋرۋىنا شالدىققان
اگرارلى ايماقتا 800 مىڭ گەكتار جەر سەپتوريوز اۋرۋىنا شالدىققان.
بۇل بيداي القاپتارىنىڭ 1\4 بولىگىن قۇرايدى. ىلعالدىڭ كوپتىگىنەن سارى التىننىڭ جارتىسىنا جۋىعى جارامسىز بولىپ قالۋى مۇمكىن. شارۋالاردىڭ ايتۋىنشا، استىقتى تەك حيميالىق وڭدەۋ جۇمىستارى عانا ساقتاپ قالا الادى.
ديقاندار قاۋىمىن سارى ۋايىمعا سالعان - سەپتوريوز. مۇندايدا سارى التىننىڭ ساباقتارىن تات باسىپ قالادى. سونىڭ سالدارىنان بيداي ۋاقىتىندا ءپىسىپ جەتىلمەيدى. ءبىر سوزبەن ايتقاندا، زيانى وراسان زور.
گەننادي ۆيكتوروۆ، اگرونوم:
- سەپتوريوزدان ەگىننىڭ 30 پايىزى ءبۇلىنۋى مۇمكىن. بىرىنشىدەن، بيدايدىڭ سالماعى جوعالادى. ەكىنشىدەن، ساپاسى تومەندەيدى. بۇل ءوز كەزەگىندە ءونىمنىڭ باعاسىنا دا كەرى اسەر ەتەدى. بيىل سولتۇستىك قازاقستاندا 4 ميلليون 340 مىڭ گەكتار جەرگە ءدان ءسىڭىرىلدى.
قۇبىلمالى اۋا رايى ديقاندار قاۋىمىن قۋانتا قويعان جوق. ماۋسىم ايى اپتاپ ىستىقپەن ەستە قالسا، شىلدە تولاسسىز جاۋعان جاڭىبىرىمەن ەرەكشەلەندى. شامادان تىس تۇسكەن ىلعالدان ەگىس القاپتارى سەپتوريوزعا شالدىقتى. اۋرۋعا ۇشىراعان استىقتى ەندى تەك دارىلەۋ ارقىلى ساقتاپ قالۋعا بولادى. مەدالباي ءابدىراحمانوۆ، ەسىل اۋداندىق اۋىل شارۋاشىلىعى ءبولىمىنىڭ باسشىسى:
- ۇكىمەت تاراپىنان 100 ميلليون تەڭگەدەن استام قارجى ءبولىندى. سول قازىر يگەرىلىپ جاتىر. اۋداندا 2 ۇشاق بار، 2 گازوگەنەراتور جۇمىس ىستەپ تۇر. جۇمىس 47 مىڭ گەكتار جەردە جۇرگىزىلىپ جاتىر. جوسپار - 60 مىڭ گەكتار جەردى قامتۋ.
ونىڭ بارلىعىن ورىندايمىز. اۋا رايىنىڭ قاباعى ەندى اشىلعان سەكىلدى. مامانداردىڭ سوزىنە سەنسەك، تامىز ايى جىلى بولماق. ءبىراق سوڭعى ونكۇندىكتە تاعى دا جاڭبىر جاۋادى دەگەن بولجام بار.
24.kz