8 وبلىستا ءورت قاۋپى ساقتالادى - قازگيدرومەت

استانا. KAZINFORM - «قازگيدرومەت» ر م ك- سى شىلدەنىڭ 2-كۇنگى كۇن رايى بولجامىن جاريالادى.

كاسىپورىن تاراتقان دەرەكتەرگە قاراعاندا، رەسپۋبليكانىڭ باسىم بولىگىنىڭ كۇن رايىن سيكلون جانە ونىمەن بايلانىستى اتموسفەرالىق فرونتالدى بولىكتەر ايقىندايدى. سونىڭ سالدارىنان نايزاعاي ويناپ، جاڭبىر جاۋادى، جەل كۇشەيەدى، ەلدىڭ باتىسىندا، شىعىسىندا بۇرشاق جاۋادى، شىعىسىندا تاعى داۋىل بولادى. تەك رەسپۋبليكانىڭ وڭتۇستىگىندە، وڭتۇستىك- شىعىسىندا نەگىزىنەن كۇن جاۋىن- شاشىنسىز بولادى. تۇنگى جانە تاڭەرتەڭگى ساعاتتاردا قازاقستاننىڭ سولتۇستىگىندە تۇمان تۇسەدى.

الماتى وبلىسىنىڭ وڭتۇستىگىندە، شىعىسىندا، جامبىل، اباي وبلىسىنىڭ شىعىسىندا، اتىراۋ وبلىسىنىڭ وڭتۇستىگىندە، باتىسىندا، پاۆلودار وبلىسىنىڭ باتىسىندا، سولتۇستىك قازاقستان، اقتوبە وبلىستارىنىڭ وڭتۇستىگىندە، ماڭعىستاۋ وبلىسىنىڭ باتىسىندا، وڭتۇستىگىندە، ورتالىعىندا، جەتىسۋ وبلىسىنىڭ باتىسىندا، وڭتۇستىگىندە جوعارى ءورت قاۋپى ساقتالادى.

جامبىل، قىزىلوردا، تۇركىستان وبلىستارىندا، الماتى وبلىسىنىڭ سولتۇستىگىندە، باتىسىندا، ورتالىعىندا، قاراعاندى وبلىسىنىڭ باتىسىندا، شىعىسىندا، وڭتۇستىگىندە، ۇلىتاۋ وبلىسىندا، اقتوبە وبلىسىنىڭ ورتالىعىندا، قوستاناي وبلىسىنىڭ وڭتۇستىك-باتىسىندا، جەتىسۋ وبلىسىنىڭ سولتۇستىگىندە، شىعىسىندا، اباي وبلىسىنىڭ ورتالىعىندا، وڭتۇستىگىندە توتەنشە ءورت قاۋپى ساقتالادى.

وسىعان دەيىن الداعى كۇندەرى اپتاپ ىستىق بولاتىنى تۋرالى جازدىق.