ەلوردادا 8,6 ميلليون گۇل ەگىلەدى

نۇر-سۇلتان. قازاقپارات - ەلوردادا گۇل ەگۋ جۇمىستارى باستالدى. قالانىڭ بارلىق اۋداندارى كوگالداندىرۋ جۇمىستارىنا كىرىسىپ كەتتى، دەپ حابارلايدى نۇر-سۇلتان اكىمدىگىنىڭ رەسمي سايتى.

«اۋدان اكىمدەرى مەردىگەرلەردى انىقتاۋ بويىنشا جۇمىستى كۇشەيتۋى كەرەك. سونداي-اق، قالا اۋداندارىنىڭ 30 مامىرعا دەيىن گۇل ەگۋ جۇمىستارىن اياقتاپ، بارلىق قاجەتتى شارالاردى قابىلداۋى كەرەكتىگىن اتاپ وتكىم كەلەدى»، - دەدى اكىمدىكتەگى كەزەكتى وتىرىستا ارمان تۇرلىبەك.

قالا اكىمى ورىنباسارىنىڭ اتاپ وتۋىنشە بيىل گۇلدەردىڭ رەكوردتىق سانى ەگىلەدى دەپ جوسپارلانۋدا. ونىڭ مالىمەتىنە قاراعاندا، ولاردىڭ سانى 8,6 ميلليوندى قۇرايدى.

جوسپارعا سايكەس كوكتەمگى كەزەڭدە قالادا 14 مىڭ اعاشتى وتىرعىزىلماق. ماسەلەن، وتكەن جىلى كوكتەمدە 13234 تال ەگىلدى. بۇگىنگە دەيىن ەلوردانىڭ بارلىق اۋداندارى 6688 اعاشتى (G)، سونداي-اق بۇتالى قورشاۋدىڭ 1450 پوگوندى مەترىن ەكتى.

سونىمەن قاتار، اۋدان باسشىلارىنا ءشوپ شابۋ جۇمىستارىن ۇيىمداستىرۋ قاجەت.

«اۋا رايىنا بايلانىستى ءشوپتىڭ قارقىندى ءوسۋى بايقالادى. وسىعان بايلانىستى بارلىق ساياباقتاردا، گۇل باقتارىندا، جول جيەگىندەگى ۋچاسكەلەردە جانە گۇلزارلاردا العاشقى ءشوپ شابۋ شارالارى 10 كۇن ىشىندە اياقتالۋى كەرەك»، - دەدى ا. تۇرلىبەك.

مۇنىمەن قوسا، ەلوردا اكىمى باقىت سۇلتانوۆ جينالعانداردىڭ نازارىن ۇيلەردىڭ ماڭىنداعى گۇلزارلاردىڭ جاعدايىنا اۋداردى.

«الايدا، الاڭداتاتىن تاعى ءبىر سۇراق بار. بۇل ۇيلەردىڭ اراسىنداعى گازوندار. قازىرگى ۋاقىتتا بۇلاردىڭ باسىم كوپشىلىگىنە ەشكىم كارامايدى. شاڭ مەن قوقىس جينالاتىن ورىنعا اينالعان. مۇنى ويلاستىرۋ قاجەت، جوبالاۋ كەزىندە بەتون نەمەسە برۋسچاتكا توسەۋدى قاراستىرۋ قاجەت»، - دەپ تۇيىندەدى ول.