ماينينگ فەرمالار 8,5 ميلليارد تەڭگەنىڭ جەڭىلدىگىن العان
بۇل تۋرالى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ ەكونوميكانىڭ ناقتى سەكتورىنا اۋديت جۇرگىزۋ ءبولىمىنىڭ باسشىسى اقىلباي ىبىرايەۆ ايتتى، دەپ حابارلايدى قازاقپارات ءتىلشىسى.
ەسەپ كوميەتتىندە «سيفرلىق قازاقستان» مەملەكەتتىك باعدارلاماسىن ىسكە اسىرۋدىڭ ارالىق باعالاۋى تالقىلانىپ جاتىر. كوميتەت وكىلى اقىلباي ىبىرايەۆ شارا الدىندا ب ا ق وكىلدەرىنە اتالعان باعدارلاما بويىنشا جىبەرىلگەن كەمشىلىكتەردىڭ كەيبىرى تۋرالى مالىمەت بەردى.
«سيفرلىق دامۋ، يننوۆاتسيالار جانە ايەروعارىش ونەركاسىبى مينيسترلىگى مەملەكەتتىك باعدارلاما ارقىلى يگەرىلگەن قارجىعا قاجەتتى دەڭگەيدە قابىلداۋ مەن مونيتورينگ جۇرگىزبەگەن. ونىڭ ۇستىنە تالداۋ فورمالدى تۇردە جۇرگىزىلگەن. سوندىقتان كوپتەگەن شارالاردىڭ تيىمدىلىگىن ادىلەتتى باعالاۋ مۇمكىن ەمەس. مىسالى، اۋديت كەزىندە اينالىسقان ۆەدومستوۆوعا باعىنىشتى «Astana hub» ۇيىمىنىڭ بازاسىندا نەگىزىنەن كريپتوۆاليۋتا ماينينگىمەن اينالىسقان ينۆەستيتسيالىق جوبالاردى انىقتادىق. بۇل حالىقارالىق ІТ - تەحنولوگيالىق پاركتىڭ نەگىزگى ماقساتى مەن مىندەتىنە كىرمەيدى»، - دەدى كوميتەت وكىلى.
ونىڭ سوزىنە قاراعاندا، اتالعان ينۆەستيتسيالىق جوبالاردى 5 كومپانيا ىسكە اسىرعان.
«5 ۇيىمنىڭ بىرەۋى عانا ماينينگ فەرما رەتىندە تىركەلگەن. قالعانى ستارتاپ- كومپانيا رەتىندە تىركەلگەن. ولاردىڭ ءبارى «Astana hub» ۇيىمىنىڭ بازاسىندا 8,5 ميلليارد تەڭگەنىڭ پرەفەرەنسيالارىن العان. ونىڭ ىشىندە سالىق جەڭىلدىكتەرى، كەڭسە جالداۋ سياقتى باسقا دا ستارتاپ جوبالارعا بەرىلەتىن قولداۋعا يە بولعان. قولدانىستاعى زاڭناما بويىنشا ولاردىڭ بۇل ارەكەتىن زاڭسىز دەپ ايتۋعا كەلمەيدى. زاڭنامانىڭ ەسكەرۋسىز قالعان تۇسىن پايدالانعان دەۋگە بولادى. سوندىقتان ءبىز بۇگىن وسى ولقىلىقتى رەتتەيتىن زاڭنامالىق وزگەرىس ەنگىزۋ ماسەلەسىن ۇسىنىپ وتىرمىز. بۇگىنگى شارا قورىتىندىسى بويىنشا ءبىرجاقتى شەشىمگە كەلەمىز دەپ ويلايمىن»، - دەدى اقىلباي ىبىرايەۆ.
ال ق ر سيفرلىق دامۋ، يننوۆاتسيالار جانە اەروعارىش ونەركاسىبى ۆيتسە- ءمينيسترى اسقار جامباقيننىڭ ايتۋىنا قاراعاندا، بۇل جەردە قارجى جەلگە ۇشتى دەپ ايتۋعا كەلمەيدى.
«قاندايدا ءبىر قارجى جەلگە ۇشتى دەگەن ماسەلە تۇرعان جوق. ولار دا ەكونوميكانىڭ سۋبەكتىسى رەتىندە، ІТ - كومپانيا رەتىندە «Astana hub» ۇيىمىنىڭ بازاسىندا تىركەلە الادى. قازىر بۇل ماسەلەنى شەشۋ ءۇشىن تىركەلۋ ەرەجەسىنە وزگەرىس ەنگىزىپ جاتىرمىز. «Astana hub» ۇيىمىنىڭ كەز كەلگەن رەزيدەنتى سالىق، كەڭسە جالداۋ جانە وزگە دە ماسەلەلەر بويىنشا جەڭىلدىكتەر الا الادى»، - دەدى ۆيتسە- مينيستر.
اۆتور: ەسىمجان ناقتىباي