فرانسياداعى شاحمات چەمپيوناتىندا 8 جاسار قازاق بالاسى 1-ورىندى يەلەندى

نۇر- سۇلتان. قازاقپارات - فرانسيادا جىلدام شاحماتتىڭ بليتس جانە راپيد تۇرلەرىنەن اشىق چەمپيونات بولدى. وندا قازاقستاننان بارعان جالعىز سپورتشى ساۋات نۇرعالييەۆ التىن مەدالدى جەڭىپ الدى، دەپ حابارلايدى قازاقپارات قازاقستاننىڭ شاحمات فەدەراتسياسىنا سىلتەمە جاساپ.

چەمپيوناتقا 539 سپورتشى قاتىستى.

ساۋات 14 پارتيادا 9 رەت جەڭىسكە جەتتى. ساۋاتتان جەڭىلگەندەردىڭ ءبىرى - 22 جاستاعى فيدە شەبەرى، فرانسيالىق دۋدونون تيبو (ەلو - 2292).

«قازىر ساۋات - ەلىمىزدە شاحماتتان سپورت شەبەرىنە ەڭ جاس ۇمىتكەر. وتكەن ايدا ول قاتارلاستارىنىڭ اراسىنداعى ەلو رەيتينگىندە كوش باستاپ، كلاسسيكا بويىنشا 9 جاسقا دەيىنگى بالالار اراسىندا الەمنىڭ ۇزدىك شاحماتشىسى اتاندى»، - دەيدى جاس دارىن يەسىنىڭ باپكەرى ەرجان شاكەنوۆ.

فرانسيا اشىق چەمپيوناتى لە- بلان- مەنيل قالاسىندا بولدى. ءبىر ايتا كەتەرلىگى، تۋرنير جاس ساناتتارىنا بولىنگەن جوق.

«ساۋاتتىڭ قارسىلاستارىنىڭ كوپشىلىگى ودان جاسى ۇلكەن ءارى تاجىريبەلى شاحماتشىلار ەدى. ءبىراق ءبىزدىڭ چەمپيون وعان پىسقىرعان دا جوق»، - دەيدى نۇر- سۇلتان قالاسى شاحمات فەدەراتسياسىنىڭ پرەزيدەنتى ابىلاي توستامبەكوۆ.