استاناداعى «بەلسەندى ۇزاق ءومىر ءسۇرۋ ورتالىعى» 7 مىڭنان استام قارياعا قىزمەت كورسەتەدى
«بەلسەندى ۇزاق ءومىر ءسۇرۋ ورتالىعىنىڭ اشىلعانىنا 4 جىلدان استام ۋاقىت ءوتتى. وسى ارالىعىندا ءبىزدىڭ ورتالىقتان 35 مىڭ زەينەتكەر ءوتتى. ءبىز بۇل ورتالىقتى بىرنەشە ادام بىرىگىپ اشقان ەدىك، ال 2022 -جىلدىڭ 1 -قاڭتارىنان باستاپ مەملەكەت قارجىلاندىرىپ كەلەدى. زەينەتكەرلەرگە قىزمەت كورسەتۋ ءۇشىن ءبىز قالانىڭ 4 اۋدانىندا ورتالىق فيليالدارىن اشتىق. وندا كۇن سايىن 9 مىڭ ادام قىزمەت الادى. بيىلعى شىلدە ايىندا استانانىڭ بەسىنشى اۋدانىندا تاعى ءبىر فيليال اشىلادى. ءبىزدىڭ زەينەتكەرلەر ورتالىقتا جانە ونىڭ فيليالدارىندا 27 قىزمەت ءتۇرىن الا الادى»، - دەدى م. ەركەتايەۆ استانا كوممۋنيكاتسيالار ورتالىعىندا وتكەن بريفينگتە.
سپيكەردىڭ ايتۋىنشا، 2019 -جىلى جۇرگىزىلگەن سوتسيولوگيالىق زەرتتەۋ استانادا حالقىنىڭ % 18- ى جالعىزباستى ادامدار ەكەنىن كورسەتكەن. ەلوردالىق زەينەتكەرلەردىڭ شامامەن % 20- ى كۇتىمدى قاجەت ەتەدى. بۇل ادامداردى الەۋمەتتەندىرۋ، باسقالارمەن بايلانىس ورناتىپ، تەزىرەك ساۋىعۋى ءۇشىن وسىنداي ورتالىق اشىلعان.
م. ەركەتايەۆ جىل باسىنان بەرى 7 مىڭنان استام قارت ادام كەلەتىنىن، ولاردىڭ كوپشىلىگى ەمحانالارعا بارمايتىنىن، ورتالىقتا ساۋىقتىرۋ، الەۋمەتتىك جانە ەكونوميكالىق قىزمەتتەر الاتىنىن اتاپ ءوتتى. كوبىسى قارجىلىق ساۋاتتىلىقتى ۇيرەنىپ جاتىر.
مەكەمە اشىلعانعا دەيىن مەديتسينالىق ۋنيۆەرسيتەتپەن جانە قالالىق ەمحانالارمەن مەموراندۋمدار جاسالعان. قازىرگى ۋاقىتتا 9 ەمحانا ورتالىقپەن تىعىز جۇمىس ىستەيدى. ەگدە جاستاعى ادامدار التسگەيمەر، پاركينسون، قانت ديابەتى، گيپەرتونيا، تىرەك- قيمىل اپپاراتىنىڭ اۋرۋلارىمەن ءجيى اۋىرادى. سوندىقتان ورتالىقتىڭ مەديتسينالىق ۇيىمداردان ايىرماشىلىعى - ەڭ الدىمەن وسى اۋرۋلاردىڭ الدىن الۋعا نازار اۋدارادى. زەينەتكەرلەرمەن الەۋمەتتىك قىزمەتكەر، پسيحولوگ جانە جالپى تاجىريبەلىك دارىگەر جۇمىس ىستەيدى. ولار وڭالتۋ گيمناستيكاسىمەن، قارتتارعا ارنالعان فيتنەسپەن، يوگامەن، ايكۋنەمەن، سكانديناۆيالىق سەرۋەندەۋمەن، «سيگۋن» تىنىس الۋ گيمناستيكاسىمەن، بيمەن، ۇستەل تەننيسىمەن اينالىسادى. بۇل ساباقتار ورتالىققا بالداقپەن كەلگەن زەينەتكەرلەرگە دە كومەكتەسەدى جانە ولار ساۋىعىپ كەتەدى.
سونداي- اق، م. ەركەتايەۆتىڭ ايتۋىنشا، ورتالىقتا مادەني- بۇقارالىق ءىس- شارالار، كونسەرتتەر، تەاترلارعا بارۋ، ەلوردانىڭ تاريحي ورىندارىنا ەكسكۋرسيالار وتكىزىلەدى. وعان قوسا، قولدانبالى ونەر ۇيىرمەلەرى جۇمىس ىستەيدى جانە زەينەتكەرلەر ءوز جۇمىستارىن جەتىم بالالارعا سىيعا تارتادى.
اۆتور:
ايجان سەرىكجان قىزى