جۇرەكتى جاقسى ساقتاۋدىڭ 7 جولى
سوندىقتان ساراپشىلار ءومىر سالتىڭىزدى وزگەرتۋ ەشقاشان كەش ەمەس ەكەنىن ەسكەرتە وتىرىپ، جۇرەككە پايدالى ناقتى ارەكەتتەردى اتادى دەپ حابارلادى turkystan.kz.
سونىمەن، جۇرەك ساعات سياقتى جۇمىس ىستەۋى ءۇشىن نە ىستەۋ كەرەك؟ امەريكالىق كارديولوگيالىق قاۋىمداستىق جۇرەكتى ساقتاۋدىڭ نەگىزگى جولدارىن ايتتى. ەندى سونىڭ ءارقايسىسىنا توقتالايىق.
دۇرىس تاماقتانىڭىز
ءبىز جەيتىن تاعام دەنساۋلىققا اسەر ەتەدى. كارديولوگتار جۇرەككە زيان كەلتىرەتىن تاعامدارعا تۇز، قانت جانە ترانسمايلار كوپ تاعامداردى جاتقىزادى. ال امەريكالىق كارديولوگيا قاۋىمداستىعىنىڭ ساراپشىلارى اتاپ وتكەندەي، جۇرەككە پايدالى ونىمگە كوكونىستەر مەن جەمىستەر، جانۋارلاردىڭ مايسىز اقۋىزى، بالىق پەن تەڭىز ونىمدەرى، وسىمدىك اقۋىزدارى، ءداندى داقىلدار، جاڭعاقتار، بۇرشاق داقىلدارى، ءزايتۇن مايى جانە باسقا دا ونىمدەر كىرەدى.
ماماندار كەڭەسى بويىنشا، مىنا تاعامداردى شەكتەگەنىڭىز ابزال: ءتاتتى سۋسىندار، الكوگول، ناتري كوزدەرى، قىزىل جانە وڭدەلگەن ەت، تازارتىلعان كومىرسۋلار، جوعارى وڭدەلگەن تاعامدار جانە تروپيكالىق مايلار (مىسالى، پالما). ساراپشىلار دۇكەننەن العان زاتىڭىزدىڭ جاپسىرماسىن وقۋعا كەڭەس بەرەدى.
قوزعالىستا بولىڭىز
دەنە بەلسەندىلىگى دەنساۋلىققا، سونىڭ ىشىندە جۇرەك- قان تامىرلارى جۇيەسىنە پايدالى. اتاپ ايتساق، دەنە بەلسەندىلىگى قان قىسىمىن تومەندەتەدى، سالماقتى ساقتاۋعا كومەكتەسەدى، قانت ديابەتىنىڭ دامۋ قاۋپىن ازايتادى، سوزىلمالى قابىنۋدى باسادى. كوپتەگەن زەرتتەۋ كورسەتكەندەي، ۇنەمى جاتتىعۋ جاسايتىن ادامداردا ينفاركت نەمەسە ومىرگە قاۋىپ توندىرەتىن باسقا جۇرەك- قان تامىرلارى اۋرۋلارىنىڭ قاۋپى از. ماماندار ەرەسەكتەرگە اپتاسىنا كەمىندە 2,5 ساعات ورتاشا نەمەسە 75 مينۋت قارقىندى فيزيكالىق بەلسەندىلىك قاجەت ەكەنىن ايتادى. ال بالالار مەن جاسوسپىرىمدەرگە كۇن سايىن كەم دەگەندە 60 مينۋتتىق فيزيكالىق بەلسەندىلىك، سونىڭ ىشىندە ويىندار مەن باسقا دا ءىس- شارالارعا قاتىسۋ ۇسىنىلادى.
تەمەكىنى تاستاڭىز
تەمەكى شەگۋ جۇرەك پەن قان تامىرلارىن زاقىمدايدى. بۇل - جۇرەك اۋرۋى مەن ءينسۋلتتىڭ نەگىزگى سەبەپتەرىنىڭ ءبىرى. ساراپشىلار تەمەكىنى تاستاۋدىڭ ارتىقشىلىقتارىن اتاپ ءوتتى. تەمەكى شەگۋدى توقتاتقاننان كەيىن ءبىر جىل وتكەن سوڭ، جۇرەكتىڭ يشەميالىق اۋرۋىنىڭ قاۋپى تەمەكى شەگەتىندەرمەن سالىستىرعاندا ەكى ەسە تومەن بولادى. سونىمەن قاتار تەمەكىنى تاستاعاننان كەيىن 5-15 جىل ىشىندە ينسۋلت قاۋپى ايتارلىقتاي تومەندەيدى. ماماندار ەلەكتروندى تەمەكى شەگۋ زيان ەكەنىن ەسكەرتەدى.
ۇيقىڭىز قالىپتى بولسىن
تۇنگى ۇيقىنىڭ جاقسى بولۋى جۇرەك-قان تامىرلارى ءۇشىن وتە ماڭىزدى. ەرەسەكتەرگە كۇنىنە جەتى- توعىز ساعات ۇيقى قاجەت بولسا، سابيلەر مەن بالالار جاسىنا بايلانىستى كوبىرەك ۇيىقتاعانى ءجون. ۇيقىنىڭ جەتكىلىكسىز بولۋى قان قىسىمىنىڭ جوعارىلاۋىنا، حولەستەريننىڭ، سالماقتىڭ ارتۋىنا جانە قانت ديابەتىنىڭ دامۋ قاۋپىنىڭ جوعارىلاۋىنا اكەلەدى. الايدا، زەرتتەۋ كورسەتكەندەي، تىم ۇزاق ۇيىقتاۋ جۇرەككە دە زيان تيگىزۋى مۇمكىن.
سالماعىڭىزدى باقىلاۋدا ۇستاڭىز
ارتىق سالماق پەن سەمىزدىك جۇرەك- قان تامىرلارى اۋرۋلارىنىڭ نەگىزگى قاۋپى بولىپ سانالادى. عالىمدار ارتىق سالماق ايەلدەردىڭ جۇرەك اۋرۋىنىڭ قاۋپىن ەكى ەسە ارتتىراتىنىن العا تارتادى. سالاۋاتتى دەنە سالماعىن ساقتاۋ دەنساۋلىققا كوپ پايدا اكەلەدى.
قانداعى قانت دەڭگەيى مەن حولەستەريندى باقىلاپ وتىرىڭىز
قانت جۇرەككە بىرنەشە جولمەن اسەر ەتەدى. قانت مولشەرى جوعارى ديەتا سەمىزدىككە اكەلۋى مۇمكىن. قانت مولشەرى جوعارى تاعامداردى جەۋ قابىنۋدى كۇشەيتۋى مۇمكىن. ال سوزىلمالى قابىنۋ جۇرەك پەن قان تامىرلارىنا اۋىرتپالىق ءتۇسىرىپ، اۋرۋدىڭ دامۋىنا اسەر ەتۋى ىقتيمال. سوندىقتان ماماندار قانداعى قانت دەڭگەيىن باقىلاپ وتىرۋعا كەڭەس بەرەدى.
ال حولەستەريننىڭ جوعارى بولۋى كوبىنە ناشار ديەتانىڭ سالدارى. بۇعان جوعارى وڭدەلگەن تاعامداردى، مايلى جانە قۋىرىلعان ەتتى، تۇزدى تاعامداردى جانە جوعارى كالوريالى دەسەرتتەردى جەۋ ىقپال ەتىپ جاتادى. جوعارى حولەستەرين دەنە بەلسەندىلىگى تومەن، ارتىق سالماعى بار نەمەسە سەمىزدىككە شالدىققان ادامداردا دا كەزدەسەدى. حولەستەريننىڭ جوعارىلاۋى اتەروسكلەروزدىڭ، ينفاركتتىڭ نەمەسە ينسۋلتتىڭ دامۋ ىقتيمالدىعىن ارتتىرادى. سوندىقتان سالا ماماندارى حولەستەريندى باقىلاپ وتىرۋدى جانە دەڭگەيى جوعارى بولسا، ونى تومەندەتۋ ءۇشىن شارا قابىلداۋدى ۇسىنادى.
قالىپتى قان قىسىمى
جوعارى قان قىسىمى ينفاركت، ينسۋلت، جۇرەك نەمەسە بۇيرەك پروبلەمالارىن تۋدىرادى. سوندىقتان قان قىسىمىن ۇنەمى تەكسەرىپ وتىرىڭىز.