مينيسترلىك قازاقستاندىق اسكەري كادرلاردى 7 شەت مەملەكەتتە وقىتادى

استانا. قازاقپارات - قورعانىس مينيسترلىگى قاجەتتىلىككە بايلانىستى اسكەري كادرلاردى شەت ەلدەردە وقىتادى.

ورتالىق كوممۋنيكاتسيالار قىزمەتىندە وتكەن بريفنگىدە اسكەري ءبىلىم جانە عىلىم دەپارتامەنتىنىڭ باسشىسى جۇمابەك احمەتوۆ وسىلاي مالىمدەدى، دەپ حابارلايدى قازاقپارات ءتىلشىسى.

«قورعانىس مينيسترلىگىنىڭ وقۋ ورىندارى جاقىن جانە الىس شەت ەلدەردە اسكەري ءبىلىم الۋ ءۇشىن ازاماتتاردى ىرىكتەۋدى جۇزەگە اسىرادى. ۇشۋ، تەڭىز، قۇرلىق، ينجەنەرلىك، مەديتسينالىق جانە گۋمانيتارلىق ماماندىقتاردى رەسەي، بەلارۋس، ارمەنيا، ا ق ش، تۇركيا، ءۇندىستان جانە پاكىستان قورعانىس ۆەدومستۆولارىنىڭ اسكەري جوعارى وقۋ ورىندارىنان الۋعا بولادى»، - دەپ توقتالدى جۇمابەك احمەتوۆ.

قوسا كەتسەك، بۇعان دەيىن دەپارتامەنت باستىعى بيىلدان باستاپ مەرزىمدى اسكەري مىندەتىن اتقارعان جاستار قورعانىس مينيسترلىگىنىڭ وقۋ ورىندارىنا ەمتيحانسىز قابىلداناتىنىن ايتقان ەدى.