كوزدىڭ كورۋىن ناشارلاتاتىن 7 ادەت

استانا. قازاقپارات – كوزدىڭ كورۋىن ناشارلاتاتىن ەڭ ءبىرىنشى فاكتور - اعزانىڭ قارتايۋى. دەگەنمەن بۇگىندە جاستار اراسىندا كوزىلدىرىكسىز جۇرەتىندەرى سيرەك كەزدەسەدى. وعان مىنا ادەتتەر سەبەپ بولۋى مۇمكىن.

1.كۇننەن قورعايتىن كوزىلدىرىك كيمەۋ

ۋلتراكۇلگىن ساۋلەلەردىڭ شامادان تىس كوپ بولۋى كوزدىڭ تورلى قابىعىن زاقىمداپ، كاتاراكتانىڭ دامۋىنا جانە ىسىكتەردىڭ پايدا بولۋىنا سەبەپ بولۋى مۇمكىن. ارينە، كۇننىڭ استىندا 1-2 ساعات ءجۇرۋ قاۋىپتى ەمەس. ءبىراق كۇندەلىكتى كۇن استىندا جۇمىس ىستەيتىن ادامدار ءۇشىن بۇل ماڭىزدى اقپارات.

2. شىلىم شەگۋ

وفتالمولوگيادا شىلىم شەگۋ مەن 40 جاسقا دەيىنگى كورۋ قابىلەتىنىڭ تومەندەۋى اراسىنداعى بايلانىس بارى بۇرىننان دالەلدەنگەن. تەمەكى شەگۋ سونىمەن قاتار جاسقا بايلانىستى ماكۋليارلى دەگەنەراتسياعا سەبەپ بولادى. بۇل تورلى قابىقتاعى كىشكەنە ايماقتىڭ زاقىمدالۋىمەن بايلانىستى. تەمەكى شەگۋ اۋرۋدىڭ دامۋ قاۋپىن ەكى ەسەگە ارتتىرادى.

3. لينزانى شەشپەي سۋعا ءتۇسۋ

ەگەر ءسىزدىڭ لينزالار جوعارى گيدروفيلدى بولسا، وندا ولارمەن سۋعا تۇسۋگە بولادى. دەگەنمەن كوز اۋرۋىن تۋدىراتىن ءتۇرلى باكتەريالاردىڭ بارىن ۇمىتپاۋ كەرەك. ولار ادەتتە وزەندە، باسسەيندە ءجيى كەزدەسەدى. ەگەر سۋعا لينزاسىز تۇسە المايتىن بولساڭىز، ولاردىڭ ساپاسىنا ءمان بەرۋدى ۇمىتپاڭىز.

4. كوزدى ءجيى ۋقالاۋ

كوزدى ۋقالاعان كەزدە قولمەن بىرگە باكتەريالار كوزگە تۇسەدى. كەيىن ءجيى «قىزىل كوز» سيندرومى بولادى. ۋقالاۋ ارقىلى كوزدىڭ قاباعىنا دا زيان كەلەدى. ءوز كەزەگىندە كەراتوكونۋستىڭ دامۋىنا اكەلۋى مۇمكىن.

5. ەكرانعا ءجيى تەلمىرۋ

ەگەر ءسىز كومپيۋتەردە ۇزاق ۋاقىت وتىرساڭىز، ءبىرازدان كەيىن ءسىز قۇرعاق كوزدىڭ جاعىمسىز بەلگىلەرىن سەزىنۋىڭىز مۇمكىن. اسىرەسە بولمە جارىعى ناشار، ال ءماتىن ۇساق شريفتپەن جازىلعاندا بايقالادى. مۇنداي جاعدايدا جىپىلىقتاۋ جيىلىگى تومەندەيدى، سونىڭ سالدارىنان كوزدىڭ شىرىشتى قاباتى باياۋ كەبەدى. ىلعالدىڭ جەتكىلىكسىزدىگىنە بايلانىستى كوز تەز شارشايدى، اينالا بۇلىڭعىر بولىپ جانە كوز لينزاسى بۇزىلا باستايدى.

6. دۇرىس تاماقتانباۋ

كوزگە دە دارۋمەن كەرەك. دارۋمەندى اعزا ارنايى تابلەتكالاردان بولەك، تاعامنان الادى. كۇندەلىكتى تۇتىناتىن تاعام قاتارىناد كوزگە دە پايدالى ءونىم بولۋى شارت. ءسابىز، كوكجيدەك، باۋىر، مايلى بالىقتى مۇمكىندىگىنشە ءجيى تۇتىنۋ كەرەك. بۇل تاعامداردىڭ جەتىسپەۋشىلىگى تورلى قابىقتىڭ بۇزىلۋىنا اكەلەدى.

7. جارىق تۋرالى ويلاماۋ

جارىعى از بولمەدە جۇمىس ىستەۋ، كىتاپ وقۋ، جازۋ ءبارى كوزدىڭ كورۋىنە ايتارلىقتاي ىسەر ەتەدى. وفتالمولوگتار جارىق جەردە جۇمىس ىستەۋگە، سۋرەت سالۋعا نەمەسە وقۋعا كەڭەس بەرەدى. جارىعى ناشار جەردە وقۋعا مۇلدە بولمايدى. ويتكەنى ول كورۋ ماسەلەلەرىنىڭ (ميوپيا مەن استيگماتيزمدى قوسا) العاشقى سەبەبى.