بۇل تۋرالى سەنات ءتوراعاسى ماۋلەن اشىمبايەۆ ءمالىم ەتتى، دەپ حابارلايدى قازاقپارات ءتىلشىسى.
«بارلىق ماسەلەنى ناقتى ايقىنداۋ ءۇشىن ءماجىلىس دەپۋتاتتارى الداعى سايلاۋدى جاڭا نورما بويىنشا وتكىزۋ باستاماسىن كوتەرىپ وتىر. ياعني پرەزيدەنتتى جەتى جىلدىق مەرزىمگە سايلاۋ ۇسىنىلدى. وسى ورايدا الداعى ۋاقىتتا ءتۇرلى تۇسىنىكتەمە بولماس ءۇشىن بۇل سايلاۋدى جاڭا فورماتتا وتكىزۋ باستاماسى جاسالدى. جەتى جىلدىق مەرزىم بويىنشا نورما نە ءۇشىن ۇسىنىلىپ وتىر؟ جالپى، الەمدىك تاجىريبەدە سايلانعان مەملەكەت باسشىسى باسىمدىققا يە بولادى. الەمدىك تاجىريبە بويىنشا سايلانعان پرەزيدەنتتەر بۇل ورىندا 10 جىل قىزمەت ەتەدى»، - دەدى م. اشىمبايەۆ سەناتتىڭ جالپى وتىرىسىنان كەيىن تىلشىلەر ساۋالىنا جاۋاپ بەرە وتىرىپ.
ونىڭ پايىمىنشا، الداعى ۋاقىتتا ءبىر ادامنىڭ قولىندا بيلىكتىڭ شوعىرلانۋىن شەكتەۋ ءۇشىن مەملەكەت باسشىسى قازقستاندا پرەزيدەنتتى ءبىر مەرزىمگە سايلاۋ باستاماسىن ۇسىندى. پرەزيدەنت مانداتىنىڭ ۇزاقتىعى 7 جىلدىق ءبىر مەرزىممەن شەكتەلەدى.
«وسى ستراتەگيالىق نورماعا دۇرىس قاراۋ كەرەك. بۇل رەتتە قازاقستاندا باسەكەلەس ساياسي ورتا قالىپتاستىرۋعا مۇمكىندىك جاسالادى. ياعني بيلىكتى مونوپوليزاتسيالاۋ قاۋپىن ازايتادى. ەگەر الەمدە بۇل مەرزىم 10 جىل بولسا، بىزدە 7 جىلمەن شەكتەلەدى. وسى مەرزىم سايلاۋ الدىنداعى باعدارلامانى جۇزەگە اسىرۋعا، حالىققا بەرگەن ۋادەنى ورىنداۋعا، ءىرى جوبالاردى ىسكە اسىرۋعا جەتكىلىكتى دەپ ويلايمىن. سوندىقتان بۇل نورما قازاقستانداعى ساياسي رەفورمالار باعدارلاماسىنىڭ ءبىر بولىگى»، - دەدى سەنات ءتوراعاسى.
بۇل تۇرعىدا م. اشىمبايەۆ 7 جىلدىق پرەزيدەنتتىك مەرزىمدى قولدايتىنىن ايتتى.
بۇدان بۇرىن حابارلانعانداي، سەنات ءتوراعاسى الداعى سايلاۋدا پارلامەنتكە، ۇكىمەتكە جاڭا ادامداردىڭ كەلۋىنە مۇمكىندىك بولاتىنىن ايتتى.
بيىل قىركۇيەك ايىنداعى جولداۋىندا مەملەكەت باسشىسى الداعى كۇزدە كەزەكتەن تىس پرەزيدەنت سايلاۋىن وتكىزۋدى ۇسىندى .
«ەسكى ءتاسىل بويىنشا سايلانعان بيلىكتىڭ وكىلدى ورگاندارىنىڭ كەزەكتەن تىس سايلاۋ ناۋقانى ارقىلى جاڭارۋى زاڭدىلىق. سوندىقتان ءماجىلىستىڭ جانە بارلىق دەڭگەيدەگى ءماسليحاتتاردىڭ سايلاۋىن كەلەسى جىلدىڭ ءبىرىنشى جارتىسىندا وتكىزۋدى ۇسىنامىن»، - دەدى قاسىم-جومارت توقايەۆ.