دانيال احمەتوۆ نەلىكتەن ش ق و تۇرعىندارىنان 7 ەسە كوپ جالاقى الاتىنىن ءتۇسىندىردى

نۇر- سۇلتان. قازاقپارات - شىعىس قازاقستان وبلىسىنىڭ اكىمى دانيال احمەتوۆ ءوزىنىڭ جانە ءوڭىر تۇرعىندارىنىڭ ەڭبەكاقىسى تۋرالى سۇراقتارعا جاۋاپ بەردى، دەپ حابارلايدى قازاقپارات ءتىلشىسى.

«ەڭ الدىمەن جالاقى جۇيەسىن، ونىڭ ىشىندە اكىمدەردىڭ جالاقىسى قالاي بەلگىلەنەتىنىن تۇسىندىرەيىن. اكىمدەردىڭ بازالىق جالاقىسى بارىندە بىردەي. ءارى قاراي ەڭبەك وتىلىنە قاراي وزگەرە بەرەدى. قازىر مەنى الەۋمەتتىك جەلىدە سىناپ كەتۋلەرىڭىز مۇمكىن، ءبىراق مەنىڭ ەڭبەك ءوتىلىم – 48 جىل. بۇل مەرزىم وسىندا وتىرعان كەز كەلگەنىڭىزدىڭ جاسىنان ۇلكەن. مەملەكەتتىك قىزمەتتە جۇرگەنىمە 33 جىل بولدى. مۇندا ءومىربايانىمدى ايتپاي- اق قويايىن، دەگەنمەن باسقا ارىپتەستەرىممەن سالىستىرعاندا مەن جەتكىلىكتى وندىرىستىك بازامەن كەلدىم. سوندىقتان دا مەنىڭ قازىرگى ەڭبەكاقىم 2 ميلليون تەڭگەدەن اسادى»، - دەدى د. احمەتوۆ ورتالىق كوممۋنيكاتسيالار قىزمەتىندە تىلشىلەرگە بەرگەن جاۋابىندا.

سونىمەن بىرگە تىلشىلەر دانيال احمەتوۆتان شىعىس قازاقستان وبلىسىنداعى ورتاشا جالاقىنىڭ قانشا ەكەنىن، اكىم جالاقىسىنان نەشە ەسە از ەكەنىن سۇرادى.

«وڭىردەگى ورتاشا جالاقى - 262 مىڭ تەڭگە. بۇل مەنىڭ جالاقىمنان 7 ەسەگە از. ءبىراق مەنىڭ اپتاسىنا نەشە كۇن جۇمىس ىستەيتىنىمدى نەگە سۇرامايسىزدار؟ تاۋلىگىنە نەشە ساعات جۇمىستا بولامىن؟ سىزدەر ءوز ومىرلەرىڭىز تۇرعىسىنان پايىم جاسايسىزدار. ال ءبىز پرەزيدەنتىمىزدىڭ تاپسىرماسىن بۇلجىتپاي ورىنداۋ تۇرعىسىنان قارايمىز»، - دەدى دانيال احمەتوۆ.

اۆتور ايجان سەرىكجان قىزى