«قاراوتكەل اۋىلدىق وكرۋگىنىڭ (يلينكا) 72 جاستاعى تۇرعىنى امانگەلدى ۇسەيىنوۆ ۇلتتىق نەيروحيرۋرگيا ورتالىعىنا سول اياققا بەرىلەتىن بەل ايماعىنداعى ادام توزگىسىز اۋىرۋلارعا، سونداي-اق اياقتىڭ ۇيۋىنا جانە اياقتى قوزعالتۋدىڭ قيىندىعىنا بايلانىستى شاعىممەن جۇگىندى. ورتالىقتىڭ جۇلىن نەيروحيرۋرگياسى جانە شەتكى جۇيكە جۇيەسىنىڭ پاتولوگياسى بولىمشەسىنىڭ دارىگەرلەرى پاتسيەنتتىڭ م ر ت سۋرەتتەرىن قاراۋ ناتيجەلەرى بويىنشا بەل ومىرتقاسىنىڭ دەگەنەراتيۆتى- ديستروفيالىق وزگەرىستەرىن انىقتادى. بولىمشە دارىگەرلەرى ومىرتقالاردىڭ L4-L5 ديسكىسىنىڭ جارىعىن ەندوسكوپيالىق - ترانسفورامينالدىق جولمەن الىپ تاستاۋ بويىنشا وپەراتسيا جاسادى»، - دەلىنگەن حابارلامادا.
جۇلىن نەيروحيرۋرگياسى بولىمشەسىنىڭ مەڭگەرۋشىسى، پروفەسسور تالعات كەرىمبايەۆتىڭ ايتۋىنشا، جارىقتى الىپ تاستاۋ وپەراتسياسى جارىقتىڭ قول جەتۋى قيىن جەردە ورنالاسقانىنا قاراماستان، بار بولعانى جەتى مينۋتتان استام ۋاقىتتى الدى. بۇل جاعدايدا دارىگەرلەر وتە جىلدام جانە جاراقاتسىز، ەڭ باستىسى ءتيىمدى ەمدەۋ ءادىسىن تاڭدادى.
ادەتتە، مۇنداي وقشاۋلانعان جارىقتار كەزىندە كەيىننەن اتالعان سەگمەنتتى يمپلانتتى بەكىتۋ جولىمەن ومىرتقا قۇرىلىمىنىڭ بولىگىن الىپ تاستايتىن جاراقاتتاۋشى ءادىس قولدانىلادى. ومىرتقا جانە جۇلىن اۋرۋلارىن ەمدەۋدىڭ وسىنداي زاماناۋي، جوعارى تەحنولوگيالىق، كىشى ينۆازيالى ادىستەرىن قولدانۋ وپەراتسيا ۋاقىتىن قىسقارتۋعا ءارى ەمدەۋ ناتيجەلەرىن جاقسارتۋعا، سونداي-اق پاتسيەنتتەردى وپەراتسيالىق ارالاسۋدان كەيىن ەرتە مەرزىمدە اياققا تۇرعىزۋعا جانە ولاردى كۇندەلىكتى ومىرگە قايتا ورالۋىنا مۇمكىندىك بەرەدى.
وپەراتسيا جەرگىلىكتى انەستەزيامەن، ناۋقاستىڭ ەسىن تولىق ساقتاي وتىرىپ جاسالدى، بۇل وپەراتسيا اياقتالا سالا پاتسيەنتتىڭ ءوز اياعىنا تۇرىپ ءجۇرىپ كەتۋىنە مۇمكىندىك بەردى.
ايتا كەتەرلىك جايت، ناۋقاستى الاڭداتاتىن بارلىق بەلگىلەر تولىعىمەن جويىلدى.
«جۇلىن نەيروحيرۋرگياسى بولىمشەسىنىڭ دارىگەرلەرىنە، مەيىرگەرلەرىنە جۇرەكجاردى العىستان باسقا ايتارىم جوق، ساۋىعىپ كەلە جاتقانىما قۋانىشىم شەكسىز! وسى ورتالىققا كەلگەندە ءوز اياعىممەن جۇرە المادىم، بالالارىم مەنى مۇگەدەكتەر ارباسىمەن الىپ كەلدى. جيىرما كۇننەن استام ۋاقىت جۇرە الماۋ بىلاي تۇرسىن، ءتىپتى ەشقانداي قوزعالىس جاساي الماي قالدىم. قازىر مەن اقىرىنداپ جۇرە باستادىم، جاقىندا ۇيدەگى شارۋالارىممەن دە اينالىسا باستايمىن دەپ ويلايمىن. بارلىعىنا شىن كوڭىلدەن العىس ايتامىن!» - دەدى ناۋقاس امانگەلدى ۇسەيىنوۆ.
اۆتور: رۋسلان عابباسوۆ