«قۇرمەتتى اقمولالىقتار! قازاقستان رەسپۋبليكاسى پرەزيدەنتىنىڭ جارلىعىمەن 2020 -جىلعى 16 -ناۋرىزدان باستاپ ەلدە توتەنشە جاعداي ەنگىزىلدى. مۇنداي شارا ەلىمىزدە تاۋەلسىزدىك العاننان بەرى العاش رەت قابىلدانىپ وتىر. بۇل كوروناۆيرۋستىق ينفەكسيانىڭ تارالۋىن تومەندەتۋ بويىنشا جاسالعان قاجەتتى قادام. كوروناۆيرۋسپەن كۇرەسۋ ءۇشىن بارلىق مەديتسينالىق ۇيىمدار مەن قۇقىق قورعاۋ ورگاندارىنىڭ قىزمەتكەرلەرى كۇشەيتىلگەن تارتىپتە جۇمىس ىستەپ جاتىر. ەلىمىزگە كوروناۆيرۋستىق ينفەكسيانىڭ ەنۋىنە بايلانىستى، اقمولا وبلىسى اۋماعىندا ۆيرۋستىڭ تارالۋىنىڭ الدىن الۋ بويىنشا جۇرگىزىلىپ جاتقان جۇمىستار تۋرالى حابارلاعىم كەلەدى»، - دەدى ەرمەك مارجىقپايەۆ.
ايماق باسشىسىنىڭ ايتۋىنشا، نۇر-سۇلتان مەن الماتى قالالارىندا ەنگىزىلىگەن كارانتينگە بايلانىستى وڭىردەگى بارلىق قىزمەتتەر كۇشەيتىلگەن رەجيمدە جۇمىس ىستەۋگە كوشتى.
«اقمولا وبلىسىنا شەت ەلدەردەن كەلگەن ازاماتتار مىندەتتى تۇدە كارانتينگە الىنادى. بۇگىنگى كۇنى وبلىس بويىنشا كارانتيندە الىنعانداردىڭ سانى 31 ادامدى قۇرايدى. ولار بارلىق جاعداي جاسالعان، وزدەرىنىڭ جاعدايلارى دا قاناعاتتانارلىق. وبلىستا كوروناۆيرۋس ينفەكسياسى تىركەلگەن جوق. الايدا، وڭىرگە ەنگىزىلگەن پروفيلاكتيكالىق شارالار كۇشىن جويمايدى»، - دەپ ودان ءارى جالعاستىردى ەرمەك مارجىقپايەۆ.
وسى رەتتە، ايماق باسشىسى توتەنشە جاعداي كەزەڭىندە ازىق-تۇلىك قاۋىپسىزدىگىن قامتاماسىز ەتۋگە، سونىمەن قاتار الەۋمەتتىك ماڭىزى بار ازىق-تۇلىك تاۋارلارىنىڭ جەتكىزىلۋىنە جانە باعانى تۇراقتاندىرۋعا باستى نازار اۋدارىلىپ وتىرعانىن اتاپ ءوتتى.
«ءىرى ساۋدا وبەكتىلەرىنىڭ، ويىن-ساۋىق مەكەمەلەرىنىڭ جانە كەيبىر قوعامدىق تاماقتانۋ وبەكتىلەرىنىڭ جۇمىسىنا ۋاقىتشا شەكتەۋ ەنگىزىلدى. الايدا، بارلىق ازىق- تۇلىك دۇكەندەرى، سۋپەرماركەتتەر، ازىق-تۇلىك بازارلارى سانيتاريالىق جانە دەزينفەكسيالىق شارالاردى كۇشەيتۋ ارقىلى كۇندەلىكتى رەجيمىندە جۇمىس ىستەيتىن بولادى. سونىمەن بىرگە، بارلىق كاسىپكەرلەردى، باعانىڭ تۇراقتىلىعىن ساقتاۋ جانە حالىققا قاجەتتى تاماق ونىمدەرىن جەتكىزۋ ارقىلى وبلىسىمىزدىڭ تۇرعىندارىنا، ەڭ الدىمەن حالىقتىڭ الەۋمەتتىك وسال توپتارىنا قولداۋ كورسەتۋلەرىن سۇرايمىن»، - دەپ تولىقتىردى ەرمەك مارجىقپايەۆ.
سونىمەن قاتار، ايماق باسشىسى نۇر-سۇلتان قالاسىنىڭ ىرگەسىندەگى اقمولا وبلىسىنا قاراستى تالاپكەر، قاراوتكەل (يلينكا)، قوياندى، قوسشى، جىبەك جولى، ى. التىنسارين جانە تايتوبە سياقتى 7 اۋىل كارانتين تىزىمىنە الىنعان اتاپ ءوتتى.
بۇل اۋىلداردىڭ تۇرعىندارى ەلورداعا كەدەرگىسىز قاتىناي بەرەدى. تەك، توتەنشە جاعداي تالاپتارىن ساقتاۋلارى كەرەك. ءسوز سوڭىندا ەرمەك مارجىقپايەۆ وبلىس تۇرعىندارىن جاڭا فورماتتا اتالىپ وتىلگەلى تۇرعان ناۋرىز مەيرامىمەن قۇتتىقتادى.