اقتوبەدە اۆتوبۋس اۋدارىلىپ، وزبەكستاننىڭ 7 ازاماتى جاراقات الدى
وزبەكستاننىڭ 7 ازاماتى ءتۇرلى دەنە جاراقاتىن الدى، دەپ حابارلايدى قازاقپارات ءتىلشىسى.
اقتوبەدە تاعى ءبىر جولاۋشىلار اۆتوبۋسى جول- كولىك وقيعاسىنا تاپ بولدى. اقتوبەدەن حرومتاۋ اۋدانىنا باعىت العان اۆتوبۋس ىشىندە بارلىعى 25 جولاۋشى بولعان. جول-كولىك وقيعاسى سالدارىنان 7 جولاۋشى ءتۇرلى دەنە جاراقاتىن الدى.
«كەشە ساعات 20:40-تا سامارا- شىمكەنت تاسجولىندا جول-كولىك وقيعاسى بولدى. حرومتاۋ اۋدانىنىڭ جازىق اۋىلى ماڭىندا اۆتوبۋس اۋدارىلىپ قالدى. «مەرسەدەس» ماركالى اۆتوبۋستىڭ 35 جاستاعى جۇرگىزۋشىسى رولگە يە بولا الماي، جول جيەگىنە شىعىپ كەتكەن. سول كەزدە اۆتوبۋس اۋدارىلدى. زارداپ شەككەن 7 جولاۋشى حرومتاۋ اۋداندىق اۋرۋحاناسىنا جەتكىزىلدى»، - دەپ حابارلادى اقتوبە وبلىستىق ءى ءى د باسپا ءسوز قىزمەتى.
ايتا كەتەيىك، قىلمىستىق كودەكستىڭ «كولىك قۇرالدارىن باسقاراتىن ادامداردىڭ جول ءجۇرىسى نەمەسە كولىك قۇرالدارىن پايدالانۋ قاعيدالارىن بۇزۋ» بابى بويىنشا ءىس قوزعالدى. تەرگەۋ ءجۇرىپ جاتىر.
ەسكە سالساق، 18 -قاڭتار كۇنى سامارا- شىمكەنت تاسجولىندا اۆتوبۋس ورتەنىپ، وزبەكستاننىڭ 52 ازاماتى قازا بولدى.