قازاق ۇلتتىق اسحاناسىنىڭ ۇمىتىلىپ بارا جاتقان 7 تاعامى - فوتو

نۇر- سۇلتان. قازاقپارات - قۋىرداق، تۇشپارا، نارىن - بۇلار قازاقتىڭ ۇلتتىق اسحاناسىنداعى تانىمال تاماق تۇرلەرى. بۇدان وزگە دە كۇندەلىكتى ومىردە ءجيى تۇتىناتىن كەرەمەت تاعام تۇرلەرى جەتەرلىك. الايدا قازاق اسحاناسىندا ەل ەستىمەگەن تاعامدار دا بار ەكەن. اتىن ەستىگەن كۇننىڭ وزىندە دە ءدامىن تاتىپ كورمەگەندەر بار بولۋى ابدەن مۇمكىن.

بۇل تۋرالى ورتالىق ازيا ونلاين حابارلايدى.

ول تاعامداردىڭ دايىندالۋ ادىستەرى الىس اۋىلداردا ساقتالعان. سونىمەن قاتار، ەجەلدەن كەلە جاتقان ۇلتتىق تاماق تۇرلەرىن قىتاي مەن موڭعوليادا تۇراتىن قانداستار دا ۇمىتپاي ساقتاپ كەلە جاتىر.

ەركەبۇلان ماكەنوۆ پەن ونىڭ سەرىكتەستەرى بيزنەس بويىنشا ادەتتەن تىس رەتسەپتەردى ىزدەپ اۋەلى ينتەرنەتتى اقتارىپ، ودان سوڭ تانىستاردان سۇراستىرىپ، ەل ارالاپ، اقىرى شەكارا اسقان. قىتاي مەن موڭعوليا قازاقتارى كوپتەگەن داستۇرلەردى، ونىڭ ىشىندە ۇلتتىق تاعامداردىڭ دايىندالۋ قۇپياسىن ءالى كۇنگە ساقتاپ وتىر ەكەن.

«موڭعوليا قازاقتارىنان ءبىز جارما- قۇرتتىڭ دايىندالۋ ءادىسىن ۇيرەندىك. ونداي تاعام ءتۇرى قازاقستاندا جوق، بار بولعان كۇننىڭ وزىندە بەلگىلى ءبىر اۋىلداردا عانا شىعار. قۇرتتىڭ مايلىلىعى كەرەمەت، ۇلكەندىگى ءداۋ تاس سەكىلدى»، - دەيدى ەركەبۇلان.

ال تالقان- ءشاي مەن قۋىرمان- ءشايدى قىتاي قازاقتارىنان الىپتى. تالقاي- ءشاي - تالقانعا ءسۇت ارالاستىرىلعان ەرەكشە سۋسىن ءتۇرى. ال قۋىرمان- ءشاي - قۋىرىلعان ۇننىڭ قاتىسۋىمەن جاسالادى ەكەن.

باس قارىن.

بۇل ەرەكشە قوناقتارعا ارنالعان. مۇنى كادىمگى اسىلعان ەت تاماقتىڭ ورنىنا دا ۇسىنۋعا بولادى ەكەن. قوي ەتىنەن دايىنالادى. اتاۋى دا تاماقتىڭ قۇرامىنا بايلانىستى قويىلعان. ەتى مەن قارىنى ءوز مايىنا بىرنەشە ساعات قايناتىلىپ دايىندالادى. ونىڭ ىشىندە پياز، بولگار بۇرىشىن، كارتوپ قوسۋعا بولادى.

ۇلپەرشەك. بۇل ءبىر اي ۋاقىت بويى ۇنعا ارالاستىرىپ ساقتالعان جىلقىنىڭ جۇرەگىنەن دايىندالادى.

«بۇل وتە ەرەكشە تاعام ەكەن، بۇعان ءتىپتى كىم كورىنگەن تاپسىرىس بەرە الماعان. اتتىڭ جۇرەگى ءپىسىپ بولعاننان كەيىن دە وتە قاتتى بولادى ەكەن. سول سەبەپتى ول ازداپ جۇمسارۋ ءۇشىن، قانىن سىعىپ الىپ، بىرنەشە جەردەن كەسىپ، تۇزداپ ۇن سالىنعان قاپشىققا سالىپ قويادى. ول ءبىر اي ۋاقىت سالقىن جەردە ساقتالادى»، - دەيدى ەركەبۇلان.

بال قۋىرداك

بارلىعى قۋىرداق تەك ۇيدە مال سويىلعان كەزدە، ەت، ىشەك- قارىن ارالاستىرىپ دايىندالاتىن تاماق عانا دەپ ءتۇسىنىپ ءوستى. ال بۇل بال- قۋىرداقتىڭ دايىندالۋ ءتاسىلى باسقاشالاۋ ەكەن. قاتىق ارالاستىرىپ قوي ەتىنەن جاسالاتىن قۋىرداقتىڭ ءدامى تىپتەن ءتاتتى.

سىرباز. سىرباز اتتى قۋىرداق قىمىزدا دايىندالادى. بۇل ەرەكشە سۋسىن قۋىرداققا تارتىمدى قىشقىل ءدام بەرىپ، ادام تابەتىن اشا تۇسەدى.

جاپپا

جاپپا - بۇل دا قۋىرداق. ءبىراق وعان پياز، بولگار بۇرىشى سەكىلدى كوكونىستەردى قوسادى. ىستىق تاماق دايىن بولعان سوڭ، ۇستىنە جۇقا يلەنگەن نان جابادى. ونىڭ پىسۋىنە 5 مينۋتتاي ۋاقىت كەرەك. وسىلايشا ەت پەن قامىر بىرىگىپ كەتەدى. بۇل تاماقتى ورتالىق قازاقستان قازاقتارى ويلاپ تاپقان دەگەن اقپارات بار.

جوڭقا

قۋىرداقتىڭ تاعى ءبىر ءتۇرى - جوڭقا. مۇنى كەز- كەلگەن ەتتەن دايىنداۋعا بولادى. ەڭ باستىسى - ونى دايىنداۋ الدىندا جاقسىلاپ مۇزداتۋ كەرەك. كەرەك كەزىندە ەتتى جاقسىلاپ ءسۇرىپ، تىلىمدەپ كەسىپ، قۋىرۋ كەرەك. بۇدان كەيىن ەتتىڭ ءدامى تاڭداي قاقتىرارلىقتاي بولادى. تاماقتىڭ كەلبەتىنىڭ ءوزى ەرەكشە كورىنىس بەرەدى.

كومبە

تاعامنىڭ بۇل ءتۇرى كومىردىڭ شوعىنا كومىلىپ جاسالادى. ۇلكەن دالاداعى وشاققا وت جاعىپ، وندا قويدىڭ سيراقتارىن ءىلىپ قويادى. شامامەن ەكى ساعاتتان سوڭ تاماق تا دايىن بولادى. مۇنى قازاقتار اسىرەسە كوشپەندىلىك زامان كەزىندە ءجيى قولدانىپتى. وزدەرى ءۇشىن عانا ەمەس، الىستا كەلە جاتقان، اداسىپ كەتكەن ادامدار ءۇشىن دە سولاي جول بويىندا دايىنداپ كەتەتىن بولعان.