استانادا تۇرعىن ءۇي سالۋعا ارنالعان جەر ۋچاسكەسىنە دەگەن سۇرانىس باس جوسپاردان 7 ەسە ارتىق
ازاماتتار جەر تەلىمىن جاقىن ارادا الۋ ۇمىتىمەن وتىنىشتەرىن جازىپ جاتىر.
«ءبىز جەكە ءۇي سالۋ ءۇشىن بەرىلەتىن جەر ۋچاسكەلەرى توڭىرەگىندە تۋىنداعان دۇربەلەڭگە بايلانىستى جيىلىپ وتىرمىز. 16 -مامىردان بۇگىنگى كۇنگە دەيىن 1237 ءوتىنىش قابىلدادىق، كەشە 773 ءوتىنىش قابىلداندى»، - دەدى استانا قالاسىنىڭ جەرىن پايدالانۋ جانە قورعاۋدى باقىلاۋ جانە جەر قاتىناستارى باسقارماسىنىڭ باسشىسى تولەۋعازى نۇركەنوۆ.
ونىڭ سوزىنە قاراعاندا، بۇگىن استانادا 103 مىڭنان استام ادام كەزەكتە تۇر. وتىنىشتەر 2006 -جىلدان قابىلدانا باستاعان. جەر 2007 -جىلى عانا بولىنگەن. ول كەزدە 1000-نان استام ۋچاسكە جەڭىلدىككە يە ازاماتتارعا بەرىلگەن. ال قالانىڭ ناقتى مۇمكىندىگى 2030 -جىلعا دەيىن شامامەن 15 مىڭ جەر ۋچاسكەسىن قۇراپ وتىر.
«استانا قالاسى 2001 بەكىتىلگەن باس جوسپارعا سايكەس دامىپ جاتىر. 2011 -جىلى وعان تۇزەتۋلەر ەنگىزىلگەن. باس جوسپارعا سايكەس استانادا 45 مىڭ جەكە ءۇي بولۋى ءتيىس، بۇگىندە ونىڭ 30 مىڭنان استامى بار. ياعني 2030 -جىلعا دەيىن ءبىز 15 مىڭ ۋچاسكە عانا بولە الامىز: ءقازىر 2016 -جىل، ءسويتىپ 14 جىلدا 15 مىڭ ۋچاسكە عانا بولە الامىز»، - دەدى ول.
تولەۋعازى نۇركەنوۆ زاڭنىڭ بۇزىلماۋى ماقساتىندا وتىنىشتەردى قابىلداۋ جۇمىستارى الداعى ۋاقىتتا دا قابىلداناتىنىن اتاپ ءوتتى. سونداي-اق ول بۇگىندە استانادا ينجەنەرلىك جەلىلەرمەن قامتىلعان دايىن الاڭدار جوق ەكەنىن ايتتى.
«سوندىقتان ءبىز ەشكىمگە ۋچاسكەلەردى بەرە المايمىز، - دەپ اتاپ ءوتتى ت. نۇركەنوۆ. تاعى دا قايتالاپ ايتامىن، 2030 -جىلعا دەيىن بارلىعى 15 مىڭ جەر ۋچاسكەسى بەرىلەدى. ال قاي جىلى قانشا جەردەن بەرىلەتىنىن مەن سىزگە قازىر ناقتى ايتا المايمىن».
ۇلتتىق ەكونوميكا مينيسترلىگىنىڭ اقپاراتىنا سايكەس، بيىلعى جىلى قازاقستاننىڭ ءبىرقاتار وڭىرلەرىندە جەكە تۇرعىن ءۇي قۇرىلىسى ءۇشىن جەر تەلىمدەرىن بەرۋ جوسپارلانعان. ونداي ايماقتار قاتارىندا الماتى وبلىسى، اقتوبە، باتىس قازاقستان، قىزىلوردا، وڭتۇستىك قازاقستان، جامبىل جانە شىعىس قازاقستان وبلىستارى بار. ال الماتى، استانا قالالارىندا، سونداي-اق ماڭعىستاۋ، قاراعاندى، سولتۇستىك قازاقستان، اقمولا، اتىراۋ وبلىستارىندا جەكە تۇرعىن ءۇي قۇرىلىسى ءۇشىن جەر تەلىمدەرىن بەرۋ بيىلعى جىلدىڭ جوسپارىندا قاراستىرىلماعان.
ەستەرىڭىزگە سالا كەتەيىك، جەكە تۇرعىن ءۇي قۇرىلىسى ءۇشىن جەر تەلىمدەرىن بەرۋ تۋرالى ەرەجەگە سايكەس، قازاقستان ازاماتتارى مەن ورالماندارعا 0,10 گەكتار جەر ۋچاسكەسى تەگىن بەرىلەدى. ءوتىنىش ءبىلدىرۋشىنىڭ يەلىگىندە بۇعان دەيىن جىلجىمايتىن مۇلىكتىڭ (پاتەر، ءۇي، گاراج، جەر تەلىمى) بولۋى نەمەسە بولماۋى جەر الۋعا ەشقانداي كەدەرگى بولا المايدى. بۇل جەردە اتاپ ءوتۋ كەرەك، تۇرعىن ءۇيدى پايدالانۋعا بەرۋ تۋرالى اكتىگە قول قويىلعاننان كەيىن عانا ءسىز جەر ۋچاسكەسىنىڭ مەنشىك يەسى اتانا الاسىز.