بىلتىر «جۇمىسپەن قامتۋ جول كارتاسى» بويىنشا 7 مىڭعا جۋىق كاسىپكەر ءوز ىستەرىن اشتى
بۇگىن پارلامەنت ماجىلىسىندە قازاقستان رەسپۋبليكاسى ۇكىمەتىنىڭ 2014 -جىلعا رەسپۋبليكالىق بيۋدجەتتىڭ اتقارىلۋى تۋرالى ەسەبىن تانىستىرعان قارجى ءمينيسترى باقىت سۇلتانوۆ وسىلاي مالىمدەدى.
«بىلتىرعى بيۋدجەتتىڭ اتقارىلۋى بويىنشا 42 باعدارلامانىڭ ىشىنەن 6 ءىرى باعىتتى ءبولىپ قاراۋعا بولادى. سونىڭ ىشىندە «جۇمىسپەن قامتۋ جول كارتاسى» بويىنشا 9 مىڭعا جۋىق كرەديت بەرىلىپ، 7 مىڭعا جۋىق كاسىپكەر ءوز ىستەرىن اشتى. «سالاماتتى قازاقستان» باعدارلاماسى بويىنشا 16 نىسان سالىنىپ، كەيبىرىنىڭ سەيسموورنىقتىلىعى كۇشەيتىلدى. ميلليونعا جۋىق حالىققا «ا» گەپاتيتىنە قارسى ەگۋ جۇمىستارى جۇزەگە اسىپ، اعزالاردى ترانسپلانتاتسيالاۋدىڭ 242 وپەراتسياسى جاسالدى. «ءبىلىم بەرۋ» باعدارلاماسى بويىنشا 92 نىسان تاپسىرىلدى، سونىڭ 52- ءى مەكتەپ. «قولجەتىمدى باسپانا» باعدارلاماسىمەن 740 مىڭ شارشى مەتر باسپانا بەرىلىپ، 1,8 مىڭ شاقىرىم ينجەنەرلىك جەلىلەر تارتىلدى» ، - دەدى ب. سۇلتانوۆ.
ونىڭ ايتۋىنشا، ەسەپتى كەزەڭدە كولىكتىك كوممۋنيكاتسيا بويىنشا 597 شاقىرىم اۆتوكولىك جولدارى پايدالانۋعا بەرىلىپ، 1140 شاقىرىمى جوندەلگەن. جەزقازعان- بەينەۋ، ارقالىق- شۇباركول باعىتىندا 1202 شاقىرىم تەمىرجول سالىندى.
اۆتور: قانات مامەتقازى ۇلى