سابيلەر 7 ايىنان باستاپ انا ءتىلى مەن شەت ءتىلىن ايىرا الادى
07:41, 16 - شىلدە 2014
استانا. قازاقپارات - سابيلەر 7 ايىنان باستاپ انا ءتىلى مەن شەت ءتىلىن ايىرا الادى، دەپ ەسەپتەيدى ۆاشينگتون ۋنيۆەرسيتەتىنىڭ عالىمدارى.
بۇلدىرشىندەر مەن ۇلكەندەردى ماگنيتوەنتسەفالوگرافيا ارقىلى زەرتتەۋ كەزىندە سابيلەر 7 اي مەن 11 ايلىق كەزىندە انا ءتىلى مەن شەت ءتىلىن ءار ءتۇرلى قابىلدايتىندىعى انىقتالدى. بۇل زەرتتەۋىن عالىمدار Proceedings of the National Academy of Sciences جۋرنالىنا جاريالاعان، دەپ جازادى لەنتا. رۋ.
ماماندار زەرتتەۋىنە 7 ايلىق جانە 11 ايلىق سابيلەردى قاتىستىرعان. ماگنيتوەنتسەفالوگراف قوسقان سوڭ ءار ءتۇرلى (تۋعان ءتىلى مەن شەت ءتىلى) تىلدەردەگى اۋديوجازبالاردى تىڭداتادى. انىقتالعانداي، تانىس دىبىستاردى ەستىگەن 7 ايلىق سابيلەر ولاردى قايتالاۋعا تىرىسقان.