قازاقستانعا 78 ەلدىڭ ازاماتتارى ۆيزاسىز كىرە الادى
بۇل تۋرالى ق ر مادەنيەت جانە سپورت ۆيتسە-ءمينيسترى ەرجان ەركىنبايەۆ تۋريزم قاۋىمداستىعىنىڭ وكىلدەرىمەن كەزدەسۋ بارىسىندا ايتتى، دەپ حابارلايدى قازاقپارات ءتىلشىسى.
ق ر مادەنيەت جانە سپورت ۆيتسە-ءمينيسترى ەرجان ەركىنبايەۆتىڭ ايتۋىنشا، قازاقستانعا ۆيزاسىز كىرەتىن ەلدەردىڭ قاتارى ارتتى.
«بۇعان دەيىن پاندەمياعا بايلانىستى شەكارالار جابىلىپ، شەكتەۋلەر قويىلعان ەدى. بۇگىنگى تاڭدا بارلىق شەكتەۋ الىنىپ تاستالدى. قازاقستانعا كەلۋ بويىنشا 78 ەلگە ۆيزاسىز رەجيم قايتارىلدى. قازىرگى ۋاقىتتا 28 مەملەكەتكە قاتىنايتىن 112 حالىقارالىق رەيس ىسكە قوسىلدى. بيىل اندوررا، يران، قىتاي ازاماتتارى ءۇشىن ۆيزاسىز رەجيم ەنگىزىلدى»، - دەدى ەرجان ەركىنبايەۆ.
سونىمەن قاتار، ول سوڭعى 3 جىلدا ينفراقۇرىلىمدىق جوبالاردى جۇزەگە اسىرۋ ءۇشىن 118 جوباعا 170 ميلليارد دوللار بولىنگەنىن تىلگە تيەك ەتتى.
«اتالعان جوبالار اياسىندا 643 شاقىرىم جول، 291 شاقىرىم سۋ قۇبىرى جانە 321 شاقىرىم كارىز جانە 108 شاقىرىم ەلەكتر جەلىسى سالىندى. قازىرگى كەزدە تۋريزم سالاسىنا ۇكىمەت تاراپىنان جىلدان جىلعا كوبىرەك ءمان بەرىلىپ كەلەدى. ماقسات - ونى ەكونوميكانىڭ تابىستى سالاسىنا اينالدىرۋ»، - دەدى ۆيتسە-ءمينيسترى.