تۇركىستانعا سالىنعان قاراجاتتىڭ 77 پايىزى جەكە ينۆەستيتسيالار

نۇر- سۇلتان. قازاقپارات - تۇركىستان وبلىسىنىڭ اكىمى ءومىرزاق شوكەيەۆ تۇركىستان قالاسىندا قانداي نىساندار سالىناتىنىن ايتىپ بەردى، دەپ حابارلايدى قازاقپارات ءتىلشىسى.

«تۇركىستان قالاسىن ءارى قاراي دامۋىنىڭ 2-كەزەڭىنە كەلسەك، تۇركىستان 4 اۋماقتا داميتىن بولادى. ءبىرىنشى - اۋەجاي اۋماعىندا 12 جوبا ىسكە اسىرىلادى. ونىڭ ىشىندە، قوناق ۇيلەر، اۋەجايعا قىزمەت ەتەتىن ارنايى نىساندار، 400 گ ا قارا ورىك باعى، 50 گ ا جەرگە جىلىجاي، ءىرى قارا بورداقىلاۋ كەشەنى، 1200 مالعا تاۋارلى- ءسۇت ءوندىرۋ فەرماسى سالىنادى»، - دەدى ءو. شوكەيەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ەكىنشى اۋماق - اكىمشىلىك- ىسكەرلىك ورتالىعى، مۇندا 57 جوبانى سالۋ جوسپارلانۋدا. اتاپ ايتقاندا ىسكەرلىك ايماقتا 4,8 ميلليون شارشى مەتر تۇرعىن ءۇي سالىپ، 46 مىڭ پاتەر پايدالانۋعا بەرىلەدى. دەنساۋلىق ساقتاۋ، سپورت، مادەنيەت نىساندارى ىسكە قوسىلادى.

«ءۇشىنشى اۋماق - ب. ساتتارحانوۆ داڭعىلىندا سپورت كەشەنى، ياسسى جەلىلىك ساياباعى جانە 182 گ ا ۋنيۆەرسيتەتتىڭ بوتانيكالىق باعى سالىنادى. ال ءتورتىنشى اۋماق - مادەني- رۋحاني ورتالىق دەپ اتالادى. بۇل جەردە دە كۇلتوبە قالاشىعىنىڭ تاريحي نىساندارىن قالپىنا كەلتىرۋ، «ازىرەت سۇلتان» مۋزەي- قورىعىنىڭ اۋماعىن اباتتاندىرۋ جوسپارلانۋدا. بۇدان بولەك، كەرۋەن ساراي تۇرعىن ءۇي كەشەنى، امانات كوتتەدجى قالاشىعى، Medina Palace قوناق ءۇيى، قىلۋەت مادەني- رۋحاني ورتالىعى سالىنادى»، - دەدى اكىم.

جالپى تۇركىستان قالاسىن دامىتۋدىڭ 2-كەزەڭىندە ينۆەستيتسيالاردىڭ كولەمى 1,3 تريلليون تەڭگە بولسا، ونىڭ 1 تريلليون تەڭگەسى نەمەسە % 77- ى جەكە ينۆەستيتسيالار بولعان.

«جاڭا كەشەندى جوسپاردى ىسكە اسىرۋ ناتيجەسىندە 2025 -جىلى جالپى وڭىرلىك ءونىم كولەمى 3,6 تريلليون تەڭگەگە جەتەدى دەگەن بولجام بار»، - دەيدى ءو. شوكەيەۆ.

اۆتور: ايجان سەرىكجان قىزى