الماتىلىق الاياق ينتەرنەت ارقىلى شاردارالىق 76 مۇعالىمنىڭ جالاقىسىن ۇرلاعان

شاردارا. قازاقپارات - تۇركىستان وبلىسى، شاردارا اۋدانىندا بەس مەكتەپ مۇعالىمىنىڭ جالاقىسىن ينتەرنەت ارقىلى ۇرلاپ العان كۇدىكتى سوتتالدى.

ايىپتالۋشى رەتىندە تانىلعان الماتى قالاسىنىڭ تۇرعىنى بەس جىلعا باس بوستاندىعىنان ايىرىلدى، دەپ حابارلايدى قازاقپارات ءتىلشىسى.

شاردارا اۋداندىق پروكۋراتۋراسىنىڭ مالىمەتىنشە، الماتىلىق جىگىت ۇستازداردىڭ ايلىعىن ينتەرنەت ارقىلى ۇرلاعان. ءسويتىپ 76 مۇعالىمگە 26 ميلليون تەڭگە كولەمىندە شىعىن كەلتىرگەن. 1C بۋحگالتەرلىك باعدارلاماسىن جەتىك مەڭگەرگەن ول قوماقتى سومانى ءوز ەسەپشوتىنا اۋدارىپ، ويىنحانالارعا جاراتقان. الايدا اقشا ەسەپشوتىنا تۇسكەن سوڭ ول كۇدىككە ءىلىنىپ، الماتى قالاسىنان ۇستالدى. ءتىنتۋ كەزىندە قالتاسىنان 1,5 ميلليون تەڭگەدەي تابىلعان. سونداي- اق، اناسى «بالام بەرگەن ەدى» دەپ 1 ميلليون 300 مىڭ تەڭگەنى پوليتسياعا تاپسىرعان. قالعان قاراجاتتىڭ باسىم كوپشىلىگىن كازينولارعا جاراتىپ قويعان بولىپ شىقتى.

«ايىپتالۋشى قىلمىستىق كودەكستىڭ 188-بابى 4- بولىگىمەن كىنالى دەپ تانىلىپ، وعان ناقتى 5 جىلعا باس بوستاندىعىنان ايىرۋ جازاسى تاعايىندالدى. قازىرگى تاڭدا سوت ۇكىمى كۇشىنە ەنگەن جوق. سونىمەن قاتار جالاقىنىڭ 12 ميلليون تەڭگەسىن دەر كەزىندە قولدانىلعان شارانىڭ ارقاسىندا ىسىراپ ەتىلمەدى. قازىرگى تاڭدا ول قارجىنىڭ بارلىعى مەملەكەت كىرىسىنە قابىلداندى»، - دەيدى شاردارا اۋدانىنىڭ پروكۋرورى رۋسلان ءابدىرايىموۆ.

بۇگىندە ۇستازداردىڭ جالاقىسى ءىشىنارا قايتارىلعان. قالعان سوما كۇدىكتىدەن قوسىمشا وندىرىلەتىن بولادى.