قازاقستاندىق 76 جاستاعى مارافونشى نيۋ-يوركتە شەتەلدىكتەردى تاڭعالدىردى - فوتو
76 جاستاعى سپورتشى 7-قاراشا كۇنى ا ق ش-تىڭ نيۋ-يورك قالاسىندا وتكەن حالىقارالىق مارافونعا قاتىستى. وسى ورايدا قازاقپارات ءتىلشىسى جەلاياق قاريامەن كىشىگىرىم سۇحبات قۇرعان بولاتىن. سالتانات تۇيتىبايەۆ 1945 -جىلى 21-شىلدەدە جامبىل وبلىسى، مويىنقۇم اۋدانى، كوكتەرەك اۋىلىندا دۇنيەگە كەلگەن. ۇستازدىق ماماندىقتى يگەرىپ، ءبىراز جىلدار مۇعالىم بولعان. كەيىن كاسىپوداق سالاسىنا اۋىسىپ، ال وداق ىدىراپ قيىن-قىستاۋ زامان باستالعاندا جەكە كووپەراتيۆ اشىپ، تىرشىلىك ەتكەن. بۇگىندە ول نۇر-سۇلتان قالاسىندا تۇرادى. كۇنى كەشە عانا مارافونشى ا ق ش- تىڭ نيۋ-يورك قالاسىندا وتكەن حالىقارالىق مارافوندا كوپشىلىكپەن بىرگە 42 شاقىرىم 195 مەتردى جۇگىرىپ ءوتتى.
«الدىمەن ايتارىم، نيۋ-يورك مارافونىندا جۇگىرۋ ءاربىر مارافونشىنىڭ باستى ارمانى. سەبەبى حالىقارالىق مارافونداردىڭ ىشىندەگى ەڭ بەدەلدىسى دەسەم بولادى. وعان الەمنىڭ تۇكپىر- تۇكپىرىنەن شامامەن 50-52 مىڭ ادام قاتىسادى. مەن وسىدان 2 جىل بۇرىن امستەردامدا جۇگىرۋ مارافونىنان بىلىكتىلىكتى راستايتىن نورماتيۆتى تاپسىردىم، نورماتيۆ ناتيجەسى بەلگىلى بولعاننان كەيىن نيۋ-يوركتەگى جۇگىرۋ مارافونىن ۇيىمداستىرۋشىلار مەنى قاتىسۋعا شاقىردى. بۇل مارافون نەگىزى بىلتىر ءوتۋى كەرەك ەدى، ءبىراق پاندەمياعا بايلانىستى كەيىنگە شەگەرىلدى. جالپى اتالعان جۇگىرۋ سايىسى جىل سايىن قاراشا ايىنىڭ العاشقى دەمالىسىندا وتەدى. شىنىمدى ايتايىن، بۇعان دەيىن مەن مۇنداي مارافوندى كورگەن ەمەسپىن. وسىعان دەيىن ءتۇرلى دەڭگەيدەگى 22 حالىقارالىق جۇگىرۋ مارافونىنا قاتىستىم»، - دەدى سالتانات تۇيتەبايەۆ.
ونىڭ ايتۋىنشا، جۇگىرۋ مارافونىنىڭ ناتيجەسى ءالى شىققان جوق.
«مارافون جاس ەرەكشەلىگىنە قاراي توپقا ءبولىنىپ ءوتتى. مەنىڭ جاسىم 76 دا مەن 75 پەن 79 جاس ارالىعىنداعى مارافونشىلار ساناتى بويىنشا قاتىستىم. جالپى جۇگىرۋ وڭايعا سوققان جوق، ويتكەنى بۇل مارافوننىڭ ءجونى مەن تالابى باسقا. دەگەنمەن قاتىسقانىما قۋانىشتىمىن، ناتيجەسىن كورە جاتارمىز. تاعى ءبىر قۋانتارلىق جاعداي، وسىنداعى قازاق باۋىرلارىمىز مەنىڭ قاتىساتىنىمدى ەستىپ، ءبىلىپ ماعان ۇلكەن قولداۋ كورسەتتى. ءوزىمىزدىڭ قازاقتىڭ بالالارى مارافون بىتكەن سوڭ مەنى كۇتىپ الىپ، گۇل شوعىن سىيلاپ، جىلى لەبىزدەرىن ءبىلدىرىپ، قۇرمەت كورسەتتى»، - دەيدى ول.
سونداي-اق، جەلاياق قاريا بۇعان دەيىن دە ءتۇرلى حالىقارالىق مارافوندارعا قاتىسقانىن ايتتى. «وسىعان دەيىن اۆستراليادا جۇگىرۋدەن وتكەن الەم بىرىنشىلىگىندە 2-ورىن الدىم. سونىمەن قاتار جاڭا زەلانديانىڭ وكلەند قالاسىندا ارداگەرلەر اراسىندا وتكەن مارافوندا 1-ورىنعا يە بولدىم. كەلەسى جىلى حالىقارالىق ارداگەرلەر مارافونىنا تاعى قاتىسام دەپ جوسپارلاپ وتىرمىن. مارافون 2022 -جىلدىڭ مامىر ايىندا جاپونيادا ءوتۋى ءتيىس، نەگىزى بيىل ءوتۋى كەرەك ەدى، وعان كوروناۆيرۋسقا بايلانىس ۋاقىتىن شەگەردى»، - دەدى جەرلەس اتامىز.
اۆتور: ءالي يبرايەۆ