سارسەنباي قوتىراشيەۆ 24 - ساۋىردە پاريجگە جەتىپ، جاياۋ ساپارىنىڭ جاڭا كەزەڭىن اياقتادى. 76 جاستاعى ساياحاتشى 3 -ناۋرىزدا جولعا شىعىپ، شامامەن 3000 شاقىرىمدى ءجۇرىپ ءوتتى. ونىڭ باعىتى سەربيا، ماجارستان، اۆستريا، گەرمانيا ارقىلى ءوتىپ، فرانسيا استاناسىندا اياقتالدى. ساياحات كەزىندە ءتۇرلى قيىندىقتار مەن شەكتەۋلەرگە قاراماستان، ول ءوز ماقساتىنا جەتتى.
بۇعان دەيىن سارسەنباي قوتىراشيەۆ قازاقستاندى جاياۋ ارالاپ، كەيىن كاۆكاز اسىپ تۇركياعا جەتكەن. ودان سوڭ التاي مەن موڭعوليا ارقىلى قىتايعا دەيىن بارعان. الەۋمەتتىك جەلىدە ول UlytauMan لاقاپ اتىمەن تانىمال. ونىڭ ءار ساپارى وقىرمانىن جىگەرلەندىرىپ، ەرەكشە قىزىعۋشىلىق تۋدىرىپ كەلەدى.
ەۋروپاداعى باعىت - ەڭ كۇردەلى كەزەڭدەردىڭ ءبىرى بولدى. قاتاڭ جول قوزعالىسى تالاپتارىنا بايلانىستى ول اۆتوباندارمەن تىكەلەي جۇرە الماي، كوبىنە ۆەلوسيپەد جولدارى مەن سوقپاقسىز جەرلەردى اينالىپ وتۋگە ءماجبۇر بولدى. ءتىپتى جۇگىن ارتقان ارباسى دا اۋىرلىققا شىداماي قالعان ساتتەر بولعانىمەن، ساياحاتشى العان بەتىنەن قايتپادى.
- مەن الەمگە قازاق حالقىنىڭ قايسار، رۋحى بيىك حالىق ەكەنىن كورسەتكىم كەلەدى. ءبىزدىڭ اتا-بابالارىمىز مەتالدى يگەرگەن، عىلىممەن اينالىسقان، جىلقىنى قولعا ۇيرەتكەن. مەن وسىنى ءوز جولىممەن دالەلدەۋدى ماقسات ەتتىم، - دەيدى سارسەنباي قوتىراشيەۆ.
پاريجدە جيھانكەز يۋنەسكو- نىڭ شتاب- پاتەرىندە دە قۇرمەتكە بولەندى. وندا ونى قازاق مادەنيەتىنىڭ جارشىسى رەتىندە قابىلداپ، ونىڭ ميسسياسىن مادەني مۇرانى ساقتاۋ مەن ناسيحاتتاۋدىڭ جارقىن ۇلگىسى دەپ باعالادى.
بۇگىندە اقساقالدىڭ ءجۇرىپ وتكەن جولى شامامەن 18 مىڭ شاقىرىمعا جەتتى. ونىڭ باستى ماقساتى - 75 جاستان اسقان ساياحاتشى رەتىندە 40 مىڭ شاقىرىمنان استام جول ءجۇرىپ، گيننەستىڭ رەكوردتار كىتابىنا ەنۋ.
ەلگە ورالعان سوڭ سارسەنباي قوتىراشيەۆ ۇستالىق ونەرىن جالعاستىرىپ، جاڭا ساپارلارعا دايىندالماق. 2027 -جىلى ول ا ق ش اۋماعىن جاياۋ كەسىپ ءوتۋدى جوسپارلاپ وتىر - اتلانت مۇحيتىنان تىنىق مۇحيتىنا دەيىن.
جيھانكەز قازاقستاندىقتاردى ۇنەمى قوزعالىستا بولىپ، ءوزىن دامىتۋعا جانە ۇلكەن ماقساتتاردان قورىقپاۋعا شاقىرادى.