اقمولا وبلىسىندا كيىكتەردەن 76,9 مىڭ گەكتار ەگىستىككە زيان كەلگەن
اتباسار اۋدانىنداعى «اگرومار ترەيد» ماگومەد دزەيتوۆتىڭ ايتۋىنشا، بيىل اقبوكەن بىلتىرعىدان دا كوپ. شارۋاشىلىقتىڭ 7 مىڭعا جۋىق گەكتار ەگىستىك القابىن تاپتاپ، ادەۋىر شىعىن كەلتىرگەن.
«اقبوكەندەر بۇرىننان ءبىزدىڭ اۋدانىمىزدا بولدى. الايدا، بيىل جىلداعىدان كوپ. ادامنان، تەحنيكادان قورىقپايدى. ەگىستىك قورعاۋ ءۇشىن كۇزەتشى دە قويدىق، ءبىراق ناتيجە جوق. بيىل كوكتەم، جاز ايلارىندا قۇرعاشىلىق بولدى، ەگىننىڭ شىعىمى ناشار. ول ازداي اقبوكەندەر تاپتاۋدا. قازىر جابايى جانۋاردان كەلتىرىلگەن شىعىن كولەمىن ەسەپتەپ جاتىرمىز. جالپى، شامامەن 6-7 مىڭ گەكتاردا ەگىستىك القاپقا زيان كەلتىرىلدى»، - دەپ ءتۇسىندىردى ماگومەد دزەيتوۆ.
ال، جارقايىڭ اۋدانىندا اقبوكەندەردەن 17 شارۋاشىلىق زارداپ شەككەن. اۋداندىق اۋىل شارۋاشىلىعى ءبولىمىنىڭ اگرونومى مۇرات بەرلىبەكوۆتىڭ مالىمەتىنشە، جازدا اۋداندا اقبوكەندەردىڭ سانى 120 مىڭعا جەتكەن.
«ءبىزدىڭ اۋىل شارۋاشىلىعى تاۋارىن وندىرۋشىلەر «وحوتزووپروم» وندىرىستىك بىرلەستىگىنىڭ قىزمەتكەرلەرىمەن بىرلەسە وتىرىپ، جانۋارلاردى اۋدان شەكاراسىنان تىس جەرگە شىعارۋ جۇمىستارىن جۇرگىزدى. الايدا، ولاردان داقىلداردى قورعاۋ مۇمكىن بولمادى.
«بۇگىنگى تاڭدا اۋداندا اقبوكەندەر 17 شارۋاشىلىق، بارلىعى 10 مىڭ گەكتار ەگىستىگىن تاپتادى»، - دەدى مۇرات بەرلىبەكوۆ.
وسىلايشا، كوكتەمگى ەگىستىك جۇمىستارىنا ميلليونداعان ينۆەستيتسيا سالعان شارۋالار ۇلكەن شىعىنعا ۇشىراپ وتىر.
«ءبىزدىڭ شارۋاشىلىق كۇزدە مول ەگىن جيناۋ ءۇشىن بارلىق اگروتەحنيكالىق شارالاردى، وزىق تەحنولوگيالاردى قولداندى. تەك، وسى اقبوكەندەرمەن كۇرەسۋدە قاۋقارسىز بولدىق. مامىر ايىنان باستاپ جانۋارلار كەلە باستادى، بۇل ءۇردىستى باقىلاۋ مۇمكىن ەمەس. تاۋلىك بويىن كەزەكشىلىك ەتتىك، ءبارى ءبىر قۋىپ ۇلگەرمەدىك. سالدارىنان 5 مىڭ گەكتار ەگىنىمىز ءبۇلىندى. ءبىز ءۇشىن بۇل وراسان زور شىعىن، - دەپ ءبولىستى جارقايىڭ اۋدانىنداعى «روستوۆ اگرو» ج ش س- ءنىڭ اگرونومى وكسانا يستومينا.
جالپى، ايماق اكىمدىگىنىڭ مالىمەتىنشە، بيىل اقمولا وبلىسىندا اقبوكەندەردەن 76,9 مىڭ گەكتار ەگىستىككە زيان كەلگەن. ەڭ ۇلكەن شىعىن كولەمى شامامەن ەگىندىكول اۋدانىندا 40 مىڭ گەكتاردان اسسا، اتباسار اۋدانىندا 17,4 مىڭ گەكتار، جارقايىڭ اۋدانىندا 9,5 مىڭ گەكتار، قورعالجىن اۋدانىندا 5,7 مىڭ گەكتار جانە جاقسى اۋدانىندا 3,7 مىڭ گەكتاردى قۇرايدى.