ەكى كۇندە 75 جول اپاتى: پوليتسيا جۇرگىزۋشىلەردى ساق بولۋعا شاقىردى
- قۇرمەتتى ازاماتتار! كۇننىڭ جىلۋىنا بايلانىستى جولداردا كولىك سانى كۇرت كوبەيدى. ءدال وسى كەزەڭدە جۇرگىزۋشىلەر جول ەرەجەسىن ساقتامايدى. بۇنىڭ سوڭى قايعىلى وقيعالارعا اكەلىپ سوقتىرادى. ەلىمىزدە ەكى كۇننىڭ ىشىندە 75 جول اپاتى بولىپ، 27 ادام قازا تاپتى. جول-كولىك وقيعالارىنىڭ كوپ بولىگى جامبىل، ماڭعىستاۋ، اتىراۋ، باتىس قازاقستان وبلىستارىندا بولدى»، - دەيدى ق ر ءى ءى م اكىمشىلىك پوليتسيا كوميتەتىنىڭ ءتوراعاسى قايسار سۇلتانبايەۆ.
ونىڭ سوزىنە قاراعاندا، اپاتتار كوبىنە قالا سىرتىنداعى جولداردا تۇندە بولعان. ءتورت ءىرى جول- كولىك وقيعاسى جەكە تاسىمالداۋمەن اينالىساتىن شەتەلدە تىركەلگەن اۆتوكولىكتەر تاراپىنان جاسالعان. جامبىل وبلىسىنداعى الماتى - شىمكەنت تاسجولىندا بولعان ءىرى اپاتتىڭ بىرىنە قاتىسۋشى - Toyota Alphard جۇرگىزۋشىسىمەن جولعا شىقپاس بۇرىن پوليتسيا قىزمەتكەرلەرى پروفيلاكتيكالىق جۇمىس جۇرگىزگەن. ءبىراق جول ەرەجەسىن ەلەمەگەن جۇرگىزۋشى مەن ونىڭ ەكى جولاۋشىسى قازا تاپتى. كەيدە وسىنداي ەسكەرتۋلەر ءومىردى ساقتاپ قالۋى مۇمكىن.
ەستەرىڭىزدە بولسىن، تاكسيگە وتىراردا ونىڭ زاڭدى تاسىمالداۋ ەكەنىنە كوز جەتكىزۋ كەرەك. اتاپ ايتقاندا، جۇرگىزۋشىدە جولاۋشىلاردى ساقتاندىرۋ شارتى، تەحنيكالىق بايقاۋدان ءوتۋ، ساپار الدىنداعى مەديتسيتسينالىق جانە تەحنيكالىق تەكسەرۋلەر بولۋى قاجەت. مىسالى، ماڭعىستاۋ وبلىسىندا جول اپاتى اۆتوكولىكتىڭ تەحنيكالىق اقاۋىنا بايلانىستى بولعان. وندا ءۇش ادام قازا تاۋىپ، بىرەۋى جاراقات الدى.
وكىنىشكە وراي، جەكە تاسىمالداۋمەن اينالاسۋعا قۇقىعى جوق تاكسي جۇرگىزۋشىلەرى كوبەيىپ كەتتى. جولدا تەكسەرۋ كەزىندە جۇرگىزۋشىلەر مۇنداي جاعدايلاردى جاسىرىپ، جولاۋشىلاردى تۋىستارىم دەپ ايتادى. ەڭ وكىنىشتىسى - ول جۇرگىزۋشىلەردى جولاۋشىلاردىڭ وزدەرى دە قولدايدى. ارزان جول ءجۇرۋ اقىسىنا قىزىعىپ، ءومىرى مەن دەنساۋلىعىن ويلامايدى. مىسالى، ءىرى جول كولىك وقيعاسى 21-مامىردا جامبىل وبلىسىنداعى مەركە - شۋ - بۋرىلبايتال تاسجولىندا تىركەلدى. وندا زاڭسىز تاسىمالداۋشى انىقتالدى. وسى اپاتتان ءۇش ادام قايتىس بولىپ، ءبىر ادام جاراقات الدى.
جول كولىك وقيعاسىنىڭ تاعى ءبىر سەبەبى - ول جۇرگىزۋشىلەردىڭ رولدە ۇيىقتاپ قالۋى. اتىراۋ وبلىسىنىڭ قۇلسارى قالاسىنان 10 شاقىرىم جەردە، بەينەۋ - اتىراۋ اۆتوجولىندا جەكە تاسىمالداۋمەن اينالىساتىن جۇرگىزۋشى رولدە ۇيىقتاپ، الدىندا كەلە جاتقان كولىككە سوعىسىپ، ءتورت ادام قازا تاۋىپ، ەكەۋى جاراقات الدى.
«جۇرگىزۋشىلەردىڭ نازارىنا! جولعا شىعار الدىندا ءسىز ءوزىڭىز ءۇشىن عانا ەمەس، جولاۋشىلاردىڭ قاۋىپسىزدىگى ءۇشىن دە جاۋاپتى ەكەنىڭىزدى ۇمىتپاڭىز. جىلدامدىقتى اسىرماڭىز، جول ەرەجەسىن ساقتاڭىز. شارشاعان جاعدايدا تىنىعىپ، دەمالىڭىز. ءبىزدىڭ تاراپتان جول ەرەجەلەرىن بۇزۋشىلارمەن كۇرەس جۇمىستارى كۇشەيتىلىپ جاتىر. پوليتسيانىڭ جۇمىسى جازالاۋعا ەمەس، سىزدەردىڭ ومىرلەرىڭىزدى ساقتاۋعا باعىتتالعان»، - دەدى ق ر ءى ى م ا پ ك ءتوراعاسى قايسار سۇلتانبايەۆ.
ايتا كەتەيىك، جامبىل وبلىسىندا جول اپاتى التى ادامنىڭ ءومىرىن جالمادى. تاعى التى جولاۋشى اۋرۋحانادا جاتىر. ەكى ناۋقاستىڭ جاعدايى اۋىر.
سالونداعىلارعا كۋاگەرلەر كومەك كورسەتە الماي تۇر. ويتكەنى ەكەۋىنىڭ دە قول-اياعى ءار جەردەن سىنىپ، جەدەل جاردەمنىڭ كەلۋىن كۇتۋگە ءماجبۇر بولعان، دەپ حابارلاعان بولاتىن ktk تەلەارناسى.
بولجام بويىنشا، جول اپاتىنا لەكسۋس جۇرگىزۋشىسى كىنالى. 30 جاستاعى ازامات قارسى باعىتقا شىعىپ كەتىپ، تويوتا الفاردپەن سوقتىعىسقان. اۋىر جاراقاتتان ەكى كولىكتىڭ جۇرگىزۋشىسى دە وقيعا ورنىندا جان تاپسىردى. تاعى ءتورت جولاۋشى سول جەردە اجال قۇشىپتى. جاراقات العان التى ناۋقاس دەرەۋ اۋرۋحاناعا جەتكىزىلگەن. ونىڭ ەكەۋى جانساقتاۋ بولىمىندە جاتىر. الەۋمەتتىك جەلىدە قازا تاپقان التى ادامنىڭ ۇشەۋى ءبىر وتباسىنان ەكەنى ايتىلۋدا.
سونداي-اق، اقتوبەدە 8 جاسار بالانى كولىك قاعىپ مەرت قىلدى.
اقتوبەنىڭ جاڭاقونىس تۇرعىن الابىندا قايعىلى وقيعا تىركەلدى. 8 جاسار بالانى كولىك قاعىپ كەتىپ، وقۋشى اۋرۋحانادا كوز جۇمدى، دەپ حابارلايدى قازاقپارات ءتىلشىسى.
وقيعا 22-مامىر كۇنى كەشكىلىك تىركەلدى. قالاداعى جاڭاقونىس تۇرعىن الابىندا «حوندا» اۆتوكولىگىنىڭ جۇرگىزۋشىسى جاياۋ جۇرگىنشىلەر وتكەلىندە 8 جاسار بالانى قاعىپ كەتتى.
«اپات سالدارىنان كامەلەتكە تولماعان بالا اۋرۋحانادا قايتىس بولدى. جول-كولىك وقيعاسى بويىنشا سوتقا دەيىنگى تەرگەۋ باستالدى. پوليتسيا دەپارتامەنتى جۇرگىزۋشىلەردى جولداردا مۇقيات بولۋعا جانە جول ەرەجەسىن قاتاڭ ساقتاۋعا شاقىرادى»، - دەپ حابارلادى اقتوبە وبلىسى پ د ج پ ق ب باستىعىنىڭ مىندەتىن اتقارۋشى ايدوس قۇلجانوۆ.
ايتا كەتەيىك، وتكەن سەنبى كۇنى اقتوبەنىڭ بايعانين اۋدانىندا ەكى كولىك سوقتىعىسىپ، 5 وقۋشىنى دارىگەرلەر قاراپ شىققان ەدى.
ءبىر وقۋشى قىزدىڭ بۇعاناسى سىنىپ، تراۆماتولوگتار گيپس سالدى.
بالالار 2009، 2010، 2011 جانە 2012 -جىلى تۋعان. ال كولىك ىشىندە بولعان جاتتىقتىرۋشى 27 جاستا. ءبارى امان.
ال وبلىستىق ءبىلىم باسقارماسىنىڭ باسشىسى جايىق سۇلتان تەرگەۋ ءجۇرىپ جاتقانىن حابارلادى.
«اۋداندىق پوليتسيا ءبولىمى انىقتاپ، تەرگەۋ جۇمىستارىن جۇرگىزىپ جاتىر. تولىق اقپاراتىن سونان سوڭ بەرەمىز»، - دەدى. سونىمەن بىرگە اتا-انالارعا ءتۇسىندىرۋ جۇمىسى جۇرگىزىلگەن.
ۆيدەو: اقتوبە وبلىستىق پ د باسپا ءسوز قىزمەتى.
ايدوس قۇلجانوۆ اقتوبە وبلىسى پ د ج پ ق ب باستىعىنىڭ مىندەتىن اتقارۋشى