كۇلاش احمەتوۆانى ارنايى قۇتتىقتاپ بارعان جامبىل وبلىسىنىڭ اكىمى بەردىبەك ساپاربايەۆ بەلگىلى قالامگەرگە ق ر پرەزيدەنتى قاسىم- جومارت توقايەۆتىڭ قۇتتىقتاۋ حاتىن جەتكىزىپ، وقىپ بەردى. مەملەكەت باسشىسى كۇلاش احمەتوۆانىڭ ولەڭدەرىنىڭ ومىرشەڭدىگىن اتاپ وتكەن. ونىڭ شىعارماشىلىعىنداعى ليريكالىق وبرازدار جارقىن ءارى ناق سۋرەتتەلىپ، دۇنيەدەگى قۇبىلىستار اقىن كوزقاراسىمەن وقىرماندارىن ەرىكسىز باۋرايتىندىعى ايتىلعان. ءوز قۇتتىقتاۋىندا مەملەكەت باسشىسى كۇلاش احمەتوۆاعا زور دەنساۋلىق جانە شىعارماشىلىق تابىس تىلەگەن. بەردىبەك ساپاربايەۆ اقىندى مەرەيتويىمەن قۇتتىقتاپ، گۇل شوعىن تابىس ەتتى.
«ءسىزدىڭ ولەڭدەرىڭىزدى بىرنەشە جاس بۋىن ۇرپاق ءسۇيىپ وقىپ، ءوستى. شىعارماشىلىعىڭىزدىڭ نەگىزى ادال دوستىق پەن ماحاببات، جومارتتىق پەن پاتريوتيزم دەسەك، سول ارقىلى جاس ۇرپاقتى دۇرىس جولعا تاربيەلەۋگە ۇلەس قوسىپ كەلەسىز. ءسىزدىڭ پاراساتتى پوەزياڭىز ارقىلى قالىڭ وقىرمان وي ءتۇيىپ، جاقسىلىققا ۇمتىلىپ، بويىڭ تۇزەيدى»، - دەپ اتاپ ءوتتى ءوڭىر باسشىسى.
كۇلاش احمەتوۆا ق ر مەملەكەتتىك سىيلىعىنىڭ لاۋرەاتى، جامبىل وبلىسىنىڭ قۇرمەتتى ازاماتى، «قۇرمەت» وردەنىنىڭ يەگەرى. اقىننىڭ شىعارمالارى الەمنىڭ كوپتەگەن تىلدەرىنە اۋدارىلعان. قاراپايىم وتباسىندا دۇنيەگە كەلگەن ك: احمەتوۆانىڭ ءومىر جولى وڭاي بولمادى. ونىڭ ەرەكشە تالانتى بالالىق شاعىندا بايقالىپ، 14 جاسىندا- اق جۇرەكجاردى بالاۋسا جىر جولدارىن قاعاز بەتىنە تۇسىرە باستادى.
بۇگىندە اقىننىڭ نازىك ليريكالىق جانە پاتريوتتىق تاقىرىپتاعى وتتى ولەڭدەرى ويلى وقىرماندارىنىڭ جۇرەك تورىنەن ورىن الىپ كەلەدى. تۇلعانىڭ قازاق دالاسىنداعى ءسوز بەن ءاننىڭ ۇلى ءرولى تۋرالى ويلارى حالىقتىق اڭىز- اڭگىمەلەرمەن ۇشتاسادى. كۇلاش احمەتوۆا «اق گۇلىم مەنىڭ»، «سەن مەنىڭ باقىتىمسىڭ»، «بۇلاقتاعى جۇلدىزدار»، «مەيىرىم»، «جاپىراق - جازدىڭ جۇرەگى» جانە تاعى دا باسقا ءبىرقاتار كىتاپتاردىڭ اۆتورى.
ول كەڭەستىك كەزەڭدە قازاقستان جاستار وداعى سىيلىعىنىڭ لاۋرەاتى اتانعان ساناۋلى مادەنيەت قايراتكەرلەرىنىڭ ءبىرى. كۇلاش احمەتوۆا قولىنان قالامىن تاستاماي، بۇگىندە ءوز شىعارمالارىندا پاتريوتتىق تاربيەگە، تۋعان جەرگە دەگەن سۇيىسپەنشىلىككە ايرىقشا باسىمدىق بەرىپ كەلەدى. مەرەيتويى قارساڭىندا كۇلاش احمەتوۆانىڭ جاڭا بەس تومدىق شىعارمالار جيناعى جارىق كورىپ، وقىرمانعا جول تارتتى. كارانتيندىك شەكتەۋلەرگە بايلانىستى مەرەيتويلىق نەگىزگى شارالار كۇزدە وتكىزىلمەك. سوعان وراي اقىننىڭ وتانعا ارنالعان جاڭا كىتابى جارىق كورەدى دەپ كۇتىلۋدە. وعان قازاقستاننىڭ ءار ايماعىنداعى تابيعاتتىڭ سۇلۋ كورىنىستەرى سۋرەتتەلگەن ولەڭدەر توپتاماسى ەنەدى.