75 ادەبيەت پەن ونەر قايراتكەرىنە مەملەكەتتىك ستيپەنديا تاعايىندالدى. ولاردىڭ اراسىندا ءاسانالى ءاشىموۆ، ءسابيت دوسانوۆ، نۇرعالي ءنۇسىپجانوۆ، دۋلات يسابەكوۆ جانە باسقا دا ونەر مايتالماندارى بار. بەلگىلى جازۋشى، قازاقستان رەسپۋبليكاسىنا ەڭبەك سىڭىرگەن قايراتكەر ءسابيت دوسانوۆتىڭ ايتۋىنشا، تۇڭعىش پرەزيدەنت ستيپەندياسىن جىلدا الادى.
«بۇل ستيپەنديانى الىپ جۇرگەنىمە 15 جىلدان استى. اتالعان ماراپات شىعارماشىلىق ادامدارىنا كەرەك دەپ ويلايمىن. مورالدىك جاعىنان بولسىن، ماتەريالدىق جاعىنان بولسىن. ادامعا جاڭا شىعارما جازۋعا شابىت بەرەدى. ءتىل مەن مادەنيەتكە مەملەكەت ۇلكەن كوڭىل ءبولىپ جاتىر. مەملەكەت باسشىسى مەن ەلباسىنا العىسىم شەكسىز»، - دەيدى قالامگەر.
قازاقستاننىڭ حالىق ءارتىسى، مەملەكەتتىك سىيلىقتىڭ لاۋرەاتى ءاسانالى ءاشىموۆ تە - وسى ستيپەنديانىڭ تۇراقتى يەگەرى.
«وسى ستەپەنديا پايدا بولعالى الىپ جاتىرمىن. ونەر ادامدارىنا كوڭىل ءبولىپ وتىرعان پرەزيدەنت قاسىم-جومارت توقايەۆقا راحمەت. پاندەمياعا قاراماستان ەلدە كوپ شارۋا اتقارىلدى. ابايدىڭ 175 جىلدىعى حالىقارالىق دەڭگەيدە، جوعارى دارەجەدە اتالىپ ءوتتى. الاش ازاماتتارىن ۇلىقتاپ جاتىرمىز، بۇل جاقسى. وتكەندى ۇمىتۋعا بولمايدى. وتكەنسىز كەلەشەك جوق. ءارقاشاندا جاقسىلىققا ۇمتىلۋ كەرەك. ەلىمىزدە قۋانىش پەن توي كوپ بولسىن»، - دەيدى اسانالى ءاشىموۆ.
ايتا كەتۋ كەرەك، ستيپەنديالار جىل سايىن قازاقستاننىڭ مادەنيەتىنىڭ قۇرىلۋىنا، ساقتالۋىنا جانە دامۋىنا قوسقان ۇلەسى ءۇشىن قۇرمەتتى اتاقتار مەن مەملەكەتتىك ناگرادالارمەن ماراپاتتالعان شىعارماشىلىق قىزمەتكەرلەرى مەن مادەنيەت قىزمەتكەرلەرىن مەملەكەتتىك قولداۋ ماقساتىندا بەرىلەدى. بۇعان دەيىن ق ر مەملەكەتتىك حاتشىسى قىرىمبەك كوشەربايەۆ قازاقستاننىڭ حالىق ءارتيسى، مەملەكەتتىك سىيلىقتىڭ لاۋرەاتى، م. اۋەزوۆ اتىنداعى قازاق ۇلتتىق اكادەميالىق دراما تەاترىنىڭ اكتەرى ءسابيت ورازبايەۆقا 1- دارەجەلى «بارىس» وردەنىن سالتاناتتى تۇردە تابىس ەتكەن بولاتىن.
اۆتور: الما مۇقانوۆا