بۇل تۋرالى مۋزەيدىڭ باسپا ءسوز قىزمەتى حابارلادى.
تاۋەلسىز قازاقستاننىڭ تاريحىندا جانە قازىرگى زامانعى مۋزەيلىك تاجىريبەدە ۇلى مەملەكەت قايراتكەرلەرىنە ارنالىپ وتكىزىلگەن جەكە كورمەلەر قاتارىنىڭ ءوسۋى بايقالادى.
مۋزەي قىزمەتكەرلەرىنىڭ ايتۋىنشا، ن. ءا. نازاربايەۆتىڭ 75 جىلدىق مەرەيتويىنا ارنالعان «قازاقستان پرەزيدەنتى» اتتى كورمە تاۋەلسىز قازاقستاننىڭ قالىپتاسۋى مەن دامۋىنداعى ۇلت كوشباسشىسىنىڭ ءرولىن اشادى.
مۇندا ونىڭ مەملەكەتتىك جانە ساياسي قىزمەتىنەن حاباردار ەتەتىن ماتەريالدار ۇسىنىلعان. ەكسپوزيتسيادا پرەزيدەنتتىڭ باسقا مەملەكەتتەرمەن بايلانىس ورناتۋداعى قىزمەتىن بەينەلەيتىن سۋرەتتەر ايتارلىقتاي ورىنعا يە. ەكسپوزيتسياعا ن. ءا. نازاربايەۆتىڭ ءومىرى جايلى فوتوسۋرەتتەر، البومدار، كىتاپتار قويىلعان. سونداي-اق، ق ر مەملەكەتتىك ورتالىق مۋزەيىنە ق ر پرەزيدەنتىنىڭ رەزيدەنتسياسى وتكىزگەن ەلباسىنا شەت مەملەكەت باسشىلارى تارتۋ ەتكەن ءارتۇرلى كادەسىيلار مەن زاتتار تۇرادى.
نۇرسۇلتان ءابىش ۇلى نازاربايەۆ 1940 -جىلى 6 -شىلدەدە الماتى وبلىسى، قاسكەلەڭ اۋدانى، شامالعان اۋىلىندا دۇنيەگە كەلگەن. 1967 -جىلى قاراعاندى مەتاللۋرگيا كومبيناتى جانىنداعى جوعارى تەحنيكالىق وقۋ ورنىن بىتىردى. ەكونوميكا عىلىمدارىنىڭ دوكتورى.
قازاقستان رەسپۋبليكاسى ۇلتتىق عىلىم اكادەمياسىنىڭ، حالىقارالىق ينجەنەرلىك اكادەميانىڭ، رەسەي فەدەراتسياسى الەۋمەتتىك عىلىمدار اكادەمياسىنىڭ اكادەميگى. ءال-فارابي اتىنداعى قازاق ۇلتتىق ۋنيۆەرسيتەتىنىڭ قۇرمەتتى پروفەسسورى. بەلارۋس عىلىم اكادەمياسىنىڭ قۇرمەتتى مۇشەسى. م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ قۇرمەتتى پروفەسسورى.
1991 ج. قازاقستان رەسپۋبليكاسى ەگەمەندىك العاننان كەيىنگى العاشقى مىندەت - تاۋەلسىز مەملەكەت قۇرۋ بولدى. 1991 -جىلدىڭ 1 -جەلتوقسانىندا وتكەن جالپىحالىقتىق سايلاۋدىڭ ناتيجەسى بويىنشا 98,7 پايىز داۋىس جيناپ، تاۋەلسىز قازاقستان رەسپۋبليكاسىنىڭ تۇڭعىش پرەزيدەنتى بولىپ سايلاندى.
2010 -جىلدىڭ 14 -ماۋسىمىندا «قازاقستان رەسپۋبليكاسىنىڭ تۇڭعىش پرەزيدەنتى - ۇلت كوشباسشىسىنىڭ قىزمەتىن قامتاماسىز ەتۋ سالاسىنداعى زاڭنامانى جەتىلدىرۋ ماسەلەلەرى بويىنشا قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا وزگەرىستەر مەن تولىقتىرۋلار ەنگىزۋ تۋرالى» № 298-ІV قازاقستان رەسپۋبليكاسىنىڭ كونستيتۋتسيالىق زاڭى كۇشىنە ەندى.
ن. ءا. نازاربايەۆ - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى، قازاقستان حالقى اسسامبلەياسىنىڭ ءتوراعاسى، «نۇر وتان» پارتياسىنىڭ ءتوراعاسى، قازاقستان رەسپۋبليكاسى قاۋىپسىزدىك كەڭەسىنىڭ ءتوراعاسى.
2015 -جىلى 26 -ساۋىردە سايلاۋشىلاردىڭ ,7 داۋىسىن الىپ، قازاقستان رەسپۋبليكاسىنىڭ پرەزيدەنتى بولىپ قايتا سايلاندى.
اۆتور: گۇلميرا عوسمانالي