تاتارستان مەكتەپتەرىندە التىن وردانىڭ 750 جىلدىعىنا قاتىستى ساباقتار وتەدى
بۇل تۋرالى ت ر عىلىم اكادەمياسى تاريح ينستيتۋتىنىڭ جانىنداعى التىن وردا جانە تاتار حاندىقتارىن زەرتتەۋ ورتالىعىنىڭ باسشىسى، تاريح عىلىمدارىنىڭ كانديداتى يلنۋر ميرگالەيەۆ ايتىپ بەردى، دەپ حابارلايدى «قازاقپارات» ح ا ا «تاتار-ينفورم» اگەنتتىگىنە سىلتەمە جاساپ.
«ءبىلىم مينيسترلىگىنە وقىتۋشىلارعا ارنالعان وقۋ قۇرالىن ازىرلەپ بەردىك. تاريح ءپانىنىڭ وقىتۋشىلارى وسى كۇنگە ارنالعان ساباق ءوتۋى ءتيىس. ءبىز ولارعا مەملەكەت تاريحىنىڭ اسا ماڭىزدى وقيعالارى قامتىلعان قىسقاشا اقپاراتتى جىبەرەمىز»، - دەدى ول.
تاريحشىنىڭ سوزىنە قاراعاندا، ادىستەمەلىك قۇرالدا التىن وردا تاريحىنداعى نەگىزگى وقيعالار مەن تۇلعالار اتالادى، ءارى وسى تاقىرىپقا قاتىستى ۇسىنىلاتىن كىتاپتاردىڭ ءتىزىمى بەرىلەدى.
«ءبىلىم بەرۋ جۇيەسى وسى اقپاراتتى تۇرعىندارعا جەتكىزۋدە بىزگە كومەكتەسەدى دەپ ۇمىتتەنەمىز. ويتكەنى بۇل تەك وقۋشىلارعا عانا ەمەس، اتا-انالارعا دا قىزىقتى. كونفەرەنتسيالار، اشىق ساباقتار وتكىزۋگە بولادى. تاريح ءپانىنىڭ ءبىر ساباعىن ءدال وسى تاقىرىپقا ارناۋعا دا بولادى. مەكتەپتەر كوپتەگەن شارالاردى وتكىزەدى، جۇرت تاتار تاريحىنا، تاتار مەملەكەتتىگىنە ارنالعان شارالاردىڭ ماڭىزىن تولىق تۇسىنەدى دەپ سەنەمىز»، - دەيدى يلنۋر ميرگالەيەۆ.