قازاقستاندا ءبىر جاسقا دەيىنگى بالا كۇتىمىنە 74 ميلليارد تەڭگە جاردەماقى تولەندى
2017 -جىلى مەملەكەتتىك الەۋمەتتىك ساقتاندىرۋ قورىنىڭ تولەمى 157 ميلليارد تەڭگەنى قۇرادى. جۇكتىلىك پەن بوسانۋ، جاڭا تۋعان بالانى اسىراپ الۋ بويىنشا الەۋمەتتىك تولەم شىعىندارى 62,6 ميلليارد تەڭگە بولسا، ءبىر جاسقا دەيىنگى بالا كۇتىمىنە - 74 ميلليارد تەڭگەدەن استام، ەڭبەككە جارامدىلىقتى جوعالتۋ بويىنشا - 9,9 ميلليارد تەڭگە، اسىراۋشىسىنان ايىرىلۋ بويىنشا - 7,8 ميلليارد تەڭگە، جۇمىستان ايىرىلۋ بويىنشا 2,1 ميلليارد تەڭگە تولەنگەن.
جۇكتىلىك پەن بوسانۋ، جاڭا تۋعان بالانى اسىراپ الۋ بويىنشا مەملەكەتتىك الەۋمەتتىك ساقتاندىرۋ قورى تولەمىنىڭ ورتاشا كولەمى شامامەن 370 مىڭ تەڭگەنى قۇرادى، مۇنداي تولەمدى 180 مىڭنان استام قازاقستاندىق الدى.
ءبىر جاسقا دەيىنگى بالا كۇتىمى بويىنشا الەۋمەتتىك تولەمنىڭ ورتاشا كولەمى 26 مىڭ تەڭگەدەن استى، مۇنداي تولەم 435 مىڭنان استام ازاماتقا بەرىلدى.
جۇمىستان ايىرىلۋ جاعدايى بويىنشا الەۋمەتتىك تولەم 36 مىڭ ادامعا بەرىلدى، ونىڭ ورتاشا كولەمى 21 مىڭ تەڭگەنى قۇرادى.
42 مىڭنان استام قازاقستاندىق اسىراۋشىسىنان ايىرىلۋ جاعدايى بويىنشا الەۋمەتتىك تولەممەن قامتىلدى، ونىڭ ورتاشا كولەمى 15 مىڭ تەڭگەنى قۇرادى. تاعى 79 مىڭ تۇرعىن ەڭبەككە جارامدىلىقتى جوعالتۋ بويىنشا 12 مىڭ تەڭگەدەن الەۋمەتتىك تولەم الدى.
ەسكە سالا كەتسەك، قازاقستاندا مىندەتتى الەۋمەتتىك ساقتاندىرۋ قورى ەڭبەككە جارامدى حالىقتى الەۋمەتتىك قورعاۋدىڭ قوسىمشا فورماسى رەتىندە ەنگىزىلدى.