ەلوردالىقتاردىڭ ورتاشا ءومىر ءسۇرۋ ۇزاقتىعى 74 جاستى قۇرايدى
جىل باسىنان بەرى ەلوردادا بالا تۋۋ كورسەتكىشى %4 عا ءوسىپ، 1000 ادامعا شاققاندا 29,78 قۇرادى. استانا قالاسىنىڭ پەريناتالدىق ورتالىقتارىندا تاۋلىگىنە ورتاشا ەسەپپەن 67-69 بالا دۇنيەگە كەلەدى.
انا مەن بالا ءولىمىن ازايتۋ بويىنشا وڭ قارقىن بايقالادى. دەموگرافيالىق جاعدايدى جاقسارتۋ، انا مەن ءسابي ءولىمىن ازايتۋ ءۇشىن استانا قالاسىنىڭ پەدياتريا قىزمەتىنىڭ تۇجىرىمداماسى ازىرلەندى. نەونتولوگيا مەن پەدياترياداعى جاڭا باعىتتاردى دامىتۋعا، مامانداردى تالىمگەرلىك پەن شەبەرلىك سىنىپتارى اياسىندا ۇزدىكسىز وقىتۋعا، ستاتسيونارلار مەن ەمحانالار اراسىنداعى ءوزارا ءىس-قيمىلدى جاقسارتۋعا باعىتتالعان جۇمىستار جۇرگىزىلەدى.
مەديتسينالىق قىزمەتتىڭ دەڭگەيىن جەتىلدىرۋ ءۇشىن دياگنوز قويۋ مەن ەمدەۋدىڭ يننوۆاتسيالىق تەحنولوگيالارى ەنگىزىلۋدە. قازىرگى كەزدە ەلوردادا جەدەل ميوكارد ينفاركتىنە قارسى كۇرەس، ينسۋلت ورتالىعى، گەمودياليز، تراۆماتولوگيا جانە ورتوپەديا ورتالىعى، بالالارعا، جاس بوسانعان انالارعا ورتودونتيكالىق كومەك كورسەتۋ ورتالىعى، كارديوورتالىق جۇمىس ىستەيدى.
قالالىق ونكولوگيالىق ورتالىق قاتەرلى جاڭا تۇزىلىمدەردى ساۋلەمەن ەمدەۋگە ارنالعان جەلىلىك جەدەلدەتكىشپەن جابدىقتالعان. بۇل بالالار مەن ەرەسەكتەردە ءتۇرلى كولەمدەگى ىسىكتەردى مەيلىنشە ءدال جانە ءدال ساۋلەلەندىرۋگە، ىسىكتى بارىنشا ۇلكەن دوزامەن ساۋلەلەندىرىپ، ساۋ اعزامەن تىندەرگە مۇمكىندىگىنشە از زيان كەلتىرىپ، الىپ تاستاۋعا مۇمكىندىك بەرەدى. بۇل الەمدەگى قاتەرلى ىسىكتى ەمدەۋگە ارنالعان ەڭ زاماناۋي اپپارات بولىپ تابىلادى.
جۇمىستى دۇرىس ۇيىمداستىرۋدا ناۋقاستاردى اۋرۋحاناعا جاتقىزۋ، ەسەپكە الۋ، ءدارى-دارمەكپەن قامتاماسىز ەتۋ بويىنشا اۆتوماتتاندىرىلعان ەلەكتروندى جۇيەلەر ءتيىمدى جۇمىس ىستەيدى. جىل سايىن قالانىڭ دەنساۋلىق ساقتاۋ كلينيكالارىندا 88 مىڭنان استام ادام ەمدەلەدى، ولاردىڭ 24 مىڭنان استامى بالالار.
حالىقتىڭ ءومىر ءسۇرۋ جاسىن ۇزارتۋ ەڭ الدىمەن حالىقتىڭ ءولىم-ءجىتىمىن ازايتۋمەن بايلانىستى. بۇل، ءوز كەزەگىندە، جۇرەك-قان تامىرلارى جۇيەسى، ونكولوگيالىق اۋرۋلار، تۋبەركۋلەز سياقتى ت. ب. اۋرۋلاردى ەرتە انىقتاۋعا باعىتتالعان سكرينينگتىك باعدارلامالار مەن ءىس-شارالاردى، ناۋقاستاردى ديسپانسەرلەرگە جاتقىزۋدى، ەمدەۋ-الدىن الۋ شارالارىن ۋاقىتىلى وتكىزۋدىڭ ارقاسىندا مۇمكىن بولىپ وتىر.