بەس جىلدا مەملەكەتتىك قولداۋ 744 مىڭنان استام ادامعا كورسەتىلدى
بۇل تۋرالى بۇگىن استانادا ق ر دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا ءمالىم ەتتى.
«وتكەن بەس جىلدىڭ ىشىندە باعدارلاما اياسىندا اتقارىلعان شارالار ەڭبەك نارىعىنداعى ساندىق ءارى ساپالىق ماندەگى نەگىزگى كورسەتكىشتەردىڭ وڭ قارقىنىنا ءوز ۇلەسىن قوستى دەپ ايتۋىمىزعا بولادى. 2010-2015 -جىلدارى ستاتيستيكالىق مالىمەتتەرگە قارايتىن بولساق، جۇمىسپەن قامتىلعان ازاماتتاردىڭ جالپى سانى ەلىمىزدە 6,3 پايىزعا، ال مەكەمەلەردە جۇمىس ىستەيتىن جالدامالى قىزمەتكەرلەردىڭ، ياعني ەڭبەك شارتىمەن قىزمەت ىستەيتىن قىزمەتكەرلەردىڭ سانى 17 پايىزعا كوبەيدى. بۇل ەكونوميكادا جاڭا جۇمىس ورىندارىنىڭ اشىلعانىن جانە وسى ورىندارعا ەل ازاماتتارىنىڭ ەڭبەككە تارتىلعانىنىڭ ايقىن دالەلى.
«جۇمىسپەن قامتۋدىڭ جول كارتاسى - 2020» اياسىندا، ياعني 5 جىلدا مەملەكەتتىك قولداۋ شارالارى 744 مىڭنان استام ادامعا كورسەتىلدى»، - دەدى ت. دۇيسەنوۆا سەناتتا وتكەن «ق ر پرەزيدەنتىنىڭ 2015 -جىلعى 30 -قاراشاداعى جولداۋى اياسىندا جۇمىسپەن قامتۋدىڭ جول كارتاسىن قۇقىقتىق قامتاماسىز ەتۋ شارالار تۋرالى» تاقىرىبىنداعى دوڭگەلەك ۇستەل وتىرىسىندا.
بۇدان بولەك، مينيستر اعىمداعى جىلى 9 مىڭنان استام شاعىن نەسيەلەردى ءبولۋ ەسكەرىلگەنىن جانە ونى الاتىندار اۋىلدىق جەرلەردە قوسىمشا 12 مىڭعا جۋىق جۇمىس ورىندارىن قۇراتىنىن جەتكىزدى.
ونىڭ سوزىنە قاراعاندا، كاسىپكەرلىك باستامالارعا قولداۋ جاسالماعان جاعدايدا حالىقتىڭ جۇمىسسىزدىق دەڭگەيى بۇگىندە 5,8 پايىزعا جەتۋى ىقتيمال ەدى.