رەسەيدەگى قانداستار 73 جاستاعى جاياۋ ساياحاتشىنى كۇتىپ الدى
ۇلىتاۋ وبلىسىندا تۇراتىن سارسەنباي قوتىراشوۆ الەم ەلدەرىن جاياۋ ارالاۋعا اتىراۋدان جولعا شىققان ەدى.
ەگدە جاستاعى ساياحاتشى الدىمەن رەسەي فەدەراتسياسىنا بەت الدى. ونى استراحان وڭىرىندەگى قانداستار كۇتىپ العان.
«سالەم، قۇرمەتتى دوستار! مەنىڭ رەسەيدە جۇرگەنىمە 4-كۇن بولدى. شەكارادان ءبىرىنشى رەت وتەتىن بولعاندىقتان، سول كۇنى قاتتى ۋايىمدادىم. وتپەلى كەزەڭنەن كەيىن مەنى رەسەي اۋماعىندا استراحان وبلىسىنىڭ قازاقتارى كۇتىپ تۇرعانىنا تاڭعالدىم. دومبىرانىڭ ۇنىمەن، قازاقى ءداستۇر بويىنشا جىلى قارسى الدى»، - دەپ جازدى قاريا الەۋمەتتىك جەلىدەگى پاراقشاسىندا.
ونىڭ ايتۋىنشا، شەكارادان العاش وتەر كەزدە الاڭداۋشىلىق بولعان. شارشاعانى دا بىلىنگەن.
«ەندى الاڭداۋشىلىق تا، شارشاۋ دا جوق. قازاق باۋىرلارىما كوپ راقمەت»، - دەيدى جاياۋ ساياحاتشى.
ەسكە سالا كەتەلىك، بۇعان دەيىن 73 جاستاعى اقساقال الەم ەلدەرىن جاياۋ ارالاۋعا اتىراۋدان جولعا شىققانىن جازعان ەدىك.
«مەنىڭ ۇستانىمىم - ساياحاتتاۋ ەشقاشان كەش ەمەس. الەم ەلدەرىن جاياۋ ارالاعان قازاق قارياسىنىڭ اتىن گيننەستىڭ رەكوردتار كىتابىنا تىركەپ، الەمدىك رەكورد ورناتسام دەيمىن. ەڭ باستىسى، بەيبىتشىلىكتى ناسيحاتتاپ، جاھان ەلدەرىن ىنتىماققا شاقىرعىم كەلەدى»، - دەگەن ەدى ول.
ۇلىتاۋلىق اقساقال 8- تامىزدا رەسەي شەكاراسىنا جەتتى.
كەيىن اتىراۋ - مۇنايلى، باي ولكە، ءبىراق جولى بىت-شىت دەپ پىكىر بىلدىرگەنىن جازعان بولاتىنبىز.
«اتىراۋ - مۇنايلى ولكە، باي ولكە. اتتەگەن-اي، سونداي بايلىقتىڭ ۇستىندە تۇرىپ، جولدىڭ سيقى مىناۋ - بىت-شىت، ءتۇيىر-ءتۇيىر تاس، توزعان اسفالت. ماشينا قاتتى ءجۇرىپ وتكەندە، ۇشقان تاس سۇيەگىڭدى سىندىرىپ جىبەرە جازدايدى. شىركىن-اي، وسىنداي بايلىقتى حالىقتىڭ يگىلىگىنە جاراتىپ، مىنا اسفالتتى جولىن جوندەپ سالسا، ەل ريزا بولىپ، ۇكىمەت باسشىسىن، دەپۋتاتتاردى ماقتاعان بولار ەدى. سونداي ماقتاۋعا يە بولاتىنداي دارەجەدە حالىققا يگىلىكتى ءىس جاساسا دەپ تىلەيمىن»، - دەدى پىكىر ءبىلدىردى سارسەنباي قوتىراشوۆ.