قازاق فۋتبولىنىڭ اڭىزى سەيىلدا بايشاقوۆ 72 جاسىندا دۇنيەدەن ءوتتى
18:56, 12 - شىلدە 2023
استانا. قازاقپارات - قازاق فۋتبولىنىڭ اڭىزى، ق ر ارداگەرلەر فۋتبولى وداعىنىڭ پرەزيدەنتى، قازاقستان فۋتبول فەدەراتسياسى پرەزيدەنتىنىڭ كەڭەسشىسى سەيىلدا بايشاقوۆ 73 جاسقا قاراعان شاعىندا ومىردەن وزدى، دەپ حابارلايدى قازاقپارات فەدەراتسياعا سىلتەمە جاساپ.
سەيىلدا يكرام ۇلى ك س ر و سپورت شەبەرى، حالىقارالىق دارەجەدەگى سپورت شەبەرى، ق ر ەڭبەگى سىڭىرگەن جاتتىقتىرۋشىسى ەدى.
ۇزاق جىلدار بويى الماتىلىق «قايراتتىڭ» كاپيتانى بولىپ، ك س ر و ۇلتتىق قۇراماسىندا وينادى.
سەيىلدا بايشاقوۆتىڭ وتاندىق فۋتبولدىڭ دامۋىنا قوسقان ۇلەسى وراسان. ەل فۋتبولى ءۇشىن ايانباي ەڭبەك ەتىپ، جاس ۇرپاققا ۇلكەن ءتالىم- تاربيە بەردى.
«قازاقستان فۋتبول فەدەراتسياسى سەيىلدا يكرام ۇلىنىڭ تۋىسقاندارى مەن جاقىندارىنا قايعىرىپ، كوڭىل ايتادى. سەيىلدا بايشاقوۆ ەسىمى ءبىزدىڭ جۇرەگىمىزدە ماڭگى قالادى» دەلىنگەن حابارلامادا.