بۇل تۋرالى ورتالىق كوممۋنيكاتسيالار قىزمەتىنىڭ الاڭىندا وتكەن نۇر-سۇلتان قالاسىندا كوروناۆيرۋستىڭ تارالۋىن بولدىرماۋ جانە ينفەكسيا بويىنشا اعىمداعى جاعدايعا ارنالعان باسپا ءسوز كونفەرەنسياسىندا ايتىلدى، دەپ حابارلايدى قازاقپارات ءتىلشىسى.
«قالاعا كىرىپ-شىعۋعا ازىرشە ۋاقىت بار. الداعى 72 ساعات اۆيا جانە تەمىر جول قاتىناستارى ارقىلى قالادان كەتۋگە نەمەسە قالاعا كەلۋگە مۇمكىندىك بەرىلىپ وتىر. وسى جىلدىڭ 22 ناۋرىزىنان باستاپ بارلىق ساناتتاعى تۇرعىندارعا قالا اۋماعىنان شىعۋعا جانە قالا اۋماعىنا كىرۋگە تولىق شەكتەۋ قويىلادى. كەز كەلگەن كولىك قاتىناستارىنىڭ ترانزيتتىك تامىسالداۋلارى نۇر- سۇلتان قالاسى اۋماعىنا توقتالماي جۇرگىزىلەدى، ياعني جولاۋشىلار پويىزدارى قالا ارقىلى وتەدى، ءبىراق توقتامايدى. قالا اۋماعىن باسىپ وتەتىن نەمەسە ازىق- تۇلىك تاسىمالدايتىن كولىكتەر ارنايى جاسىل دالىزبەن عانا قاتىنايدى»، - دەيدى نۇر-سۇلتان قالاسى اكىمىنىڭ ورىنباسارى باحتيار ماكەن.
ونىڭ ايتۋىنشا، اتالعان شارتتاردىڭ ورىندالۋى ءۇشىن ءبىرقاتار تالاپتار كۇشەيتىلەدى. «بىرىنشىدەن، ينفەكسيانىڭ تارالۋىنا جول بەرمەۋ ءۇشىن ارنايى وڭىرلىك جەدەل شتابى كۇردەلى جۇمىس اتقارىپ جاتىر. ول تاۋلىك بويى قىزمەت ەتەدى.
ەكىنشىدەن، توتەنشە جاعداي كەزىندە كارانتينگە سايكەس حالىق پەن شارۋاشىلىق سۋبەكتىلەرىنىڭ قىزمەتىن رەتتەۋ ءۇشىن قالالىق شتابتىڭ ارنايى شەشىمى قابىلداندى.
ۇشىنشىدەن، كارانتين جاعدايىندا قالالىق ازىق- تۇلىك قاۋىپسىزدىگىن قامتاماسىز ەتۋ ءۇشىن ارنايى ءىس-شارالار جوسپارى ىسكە اسۋدا. قوسىمشا ازىق- تۇلىك تاۋارلارىن جەتكىزۋ ماسەلەسى وڭىرلەرمەن بىرلەسىپ وتىرىپ شەشىلدى. قازىرگى تاڭدا حالىققا ەڭ ءبىرىنشى قاجەتتى الەۋمەتتىك جانە تۇتىنۋشىلىق تاۋارلار قورى جەتكىلىكتى. ساۋدا ۇيلەرى مەن قويمالاردا ارتىق كولەمدە قور جيناقتالعان.
تورتىنشىدەن، ق ر دەنساۋلىق ساقتاۋ مينيسترلىگىنىڭ ءتيىستى شارالارىنا سايكەس، «ا» جانە «ب» جوسپارىنداعى ءىس- قيمىل الگوريتمىنە سايكەس كورناۆيرۋس ينفەكتسياسىن جۇقتىرعان ادامدارمەن بايلانىستا بولعان تۇلعالارعا ارنايى جاتاتىن ورىندارى مەن كارانتين ستاتسيونارلارى كەڭەيتىلدى. ەگەر «س» جوسپارىنا سايكەس بولاتىن بولسا، قوسىمشا جاتاتىن ورىنداردى قالا بويىنشا جاساقتادىق. بەسىنشىدەن، فارماتسيەۆتيكا قاۋىمداستىعى جانە تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى اراسىنداعى باعانى رەتتەۋ بويىنشا، سونداي-اق دارىگەرلىك جانە مەديتسينالىق تاۋارلاردى جەتكىزۋ بويىنشا ءوزارا ىنتىماقتاستىق مەموراندۋمعا قول قويىلدى. مەموراندۋمعا سايكەس ءتيىستى جۇمىستاردى اتقارىپ جاتىرمىز»، - دەيدى ول.
اۆتور: زارينا قاھارمان