قازاقستاندىقتاردىڭ ورتاشا جاسى - 72,3 ءتى قۇرادى
بۇل تۋرالى بۇگىن ق ر دەنساۋلىق ساقتاۋ ۆيتسە-ءمينيسترى الەكسەي تسوي ءمالىم ەتتى، دەپ حابارلايدى «قازاقپارات» ح ا ا ءتىلشىسى.
بۇگىن ق ر دەنساۋلىق ساقتاۋ ءمينيسترى ەلجان ءبىرتانوۆتىڭ قاتىسۋىمەن استانادا ەلىمىزدەگى دەنساۋلىق ساقتاۋ سالاسىندا اتقارىلعان جۇمىستاردىڭ العاشقى جارتىجىلدىعى قورىتىندىلانىپ جاتىر.
جيىندا مەديتسينالىق قۇرىلعىلاردى جاڭارتۋ، بيۋدجەتتىك قارجىنى پايدالانۋ، مەديتسينالىق كادرلارمەن قامتاماسىز ەتۋ ماسەلەلەرى بويىنشا وڭىرلەردىڭ كورسەتكىشتەرى ساراپتالۋدا.
«2016-2019-جىلدارعا ارنالعان «دەنساۋلىق» باعدارلاماسى بويىنشا نەگىزگى كورسەتكىشتەر قالىپتى. 2016-جىلدىڭ قورىتىندىسى بويىنشا قازاقستاندىقتاردىڭ ورتاشا جاسى 72,3 جاسقا جەتتى. وتكەن جىلدىڭ وسى كەزەڭىمەن سالىستىرعاندا (6 اي بويىنشا) انا ءولىمى 10,8 پروتسەنتكە ازايدى. ءولىم جاعدايلارى ينفاركتتان %5,5 كە، قايعىلى جاعداي مەن جاراقات الۋدان %8,6 كە، تۋبەركۋلەزدەن 2,2 كە تومەندەدى»، - دەيدى د س م ۆيتسە-ءمينيسترى الەكسەي تسوي.
جيىن بارىسىندا «دەنساۋلىق» باعدارلاماسى بويىنشا نەگىزگى كورسەتكىشتەرى تومەن وڭىرلەردىڭ دەنساۋلىق ساقتاۋ باسقارماسىنىڭ باسشىلارى بايانداما جاساپ جاتىر.
اۆتور: ايان بەكەن ۇلى