شىعىس قازاقستاندا 70 جاستاعى وقۋشى قىركۇيەكتە پارتاعا وتىرماق
ش ق و بويىنشا ق ا ج دەپارتامەنتى باسپا ءسوز قىزمەتىنىڭ مالىمەتىنە سۇيەنسەك، بيىل ءوڭىر بويىنشا تۇزەتۋ مەكەمەلەرىندە جازاسىن وتەپ جاتقان 240 ادام قىركۇيەكتە مەكتەپ وقۋشىلارى سەكىلدى الگەبرا، گەومەتريا، فيزيكا سىندى پاندەردى وقيدى.
ماسەلەن، №18 تۇزەتۋ مەكەمەسىندە 49 وقۋشى بار. ونىڭ ىشىندە ەڭ كىشىسى 20 جاستا، ال ەڭ ەگدەسى 70 تە. ولاردىڭ بارلىعى ورتا ءبىلىم تۋرالى اتتەستات العىسى كەلەدى.
سوتتالعانداردىڭ ءبىرى ومىرىندە بار بولعانى 8 سىنىپتى اياقتاعانىن ايتتى. قازىر ول اۋىر قىلمىس جاساعانى ءۇشىن جازاسىن وتەپ جاتىر. ءبىر جىلىن تۇرمەدە وتكىزگەن ەر ادام ەندى 7 جىلدان كەيىن بوستاندىققا شىعادى. سول كەزدە قولىندا اتتەستات بولعانىن قالايدى.
«كولونياعا تۇسەتىندەردىڭ كوبى مەكتەپتى اياقتاپ ۇلگەرمەگەن. سول ءۇشىن ولارعا وسىنداي مۇمكىندىك جاسالىپ وتىر. بۇل سوتتالعانداردىڭ ءبىلىم الىپ، ەرتەڭ بوستاندىققا شىققاننان كەيىن قوعامعا وڭاي بەيىمدەلۋىنە مۇمكىندىك بەرەدى»، - دەيدى اتالعان تۇزەتۋ مەكەمەسى باستىعىنىڭ ورىنباسارى قادىرحان حامزين.
كەيبىر تۇرمەلەردە مەكتەپتەردەن بولەك كوللەدجدەر دە بار. اتاپ ايتقاندا، №16، 17، 18 جانە 22 مەكەمەلەردە ارناۋلى ءبىلىم الۋعا بولادى.