بيىل مەكتەپكە بارعان بالالاردىڭ 70 پايىزى قازاق سىنىبىن تاڭداعان
07:35, 22 - تامىز 2023
استانا. قازاقپارات - اقپارات جانە قوعامدىق دامۋ ءمينيسترى دارحان قىدىرالى بيىل مەكتەپكە بارعان بالالاردىڭ 70 پايىزى قازاق سىنىبىن تاڭداعانىن ايتتى، دەپ حابارلايدى قازاقپارات.
«وزەكتى» YouTube-جوباسىنا بەرگەن سۇحباتىندا مينيستر وزگە سالالاردا دا قازاق تىلىنە سۇرانىستىڭ ارتقانىن جەتكىزگەن.
«بيىل مەكتەپ تابالدىرىعىن اتتايتىن بالالاردىڭ 70 پايىزى قازاق سىنىبىنا بارۋدى تاڭداعان. تەك ءبىلىم سالاسىندا ەمەس، كەز كەلگەن سالادا قازاق تىلىنە سۇرانىستىڭ كۇرت وسكەنىن كورىپ وتىرمىز. جالپى، قازاق ءتىلى قازىر ەلىمىزدەگى ءتۇرلى ەتنوس وكىلدەرى اراسىندا ترەندكە اينالدى. بۇگىندە ورتاشا ەسەپپەن اقپارات سالاسى اۋديتورياسىنىڭ 85 پايىزى مەملەكەتتىك تىلدەگى ءونىمدى تۇتىنىپ وتىر. ال 14-35 جاس اراسىنداعى جاستار ينتەرنەت كەڭىستىكتە 70 پايىزدان استام كونتەنتتى قازاق تىلىندە ىزدەگەن»، - دەيدى سالا باسشىسى.