جەمقورلاردان تاركىلەنگەن قارجىعا 70 تەن استام مەكتەپ سالىنادى

استانا. قازاقپارات - بيىل ەلىمىزدە سىبايلاس جەمقورلىق ءىسى بويىنشا تاركىلەنگەن قاراجاتقا مەكتەپ سالىنا باستايدى. بۇل تۋرالى وقۋ- اعارتۋ ءمينيسترى عاني بەيسەمبايەۆ ءمالىم ەتتى، دەپ حابارلايدى قازاقپارات ءتىلشىسى.

«جەمقورلاردان تاركىلەنگەن قارجىعا بيىل ەلىمىزدە 70-تەن استام مەكتەپ سالىنادى. بىزدە مەكتەپ قۇجاتتارى مەن ءتىزىمى بار. جۋىردا مەكتەپ قۇرىلىسىنا قارجى بولىنەدى. مەكتەپتەر ەلىمىزدىڭ بارلىق وڭىرىندە سالىنادى»، - دەدى عاني بەيسەمبايەۆ ۇكىمەت وتىرىسىنان كەيىن ب ا ق وكىلدەرىنىڭ ساۋالىنا جاۋاپ بەرە تۇرىپ.

ءمينيستردىڭ ناقتىلاۋىنشا، جەمقورلىقتان جينالعان قارجى جاڭا مەكتەپتەرمەن قاتار قۇرىلىسى باستالعان مەكتەپتەرگە دە جۇمسالادى.

ەسكە سالايىق، مەملەكەت باسشىسى بىلتىر 1- جەلتوقساندا جاريالاعان جولداۋىندا: «جەمقورلاردىڭ زاڭسىز تاپقان قارجىسى ولار سوتتالعان سوڭ مەملەكەتكە ءوتىپ، تۇگەلدەي مەكتەپ قۇرىلىسىنا جۇمسالۋعا ءتيىس»، - دەپ اتاپ وتكەن بولاتىن.

جولداۋ جاريالانعان ءبىر ايدان استام ۋاقىتتان كەيىن ۇكىمەت باسشىسى ءاليحان سمايىلوۆ «ءبىلىم بەرۋ ينفراقۇرىلىمىن قولداۋ قورىنىڭ» ەسەپشوتىنا 50 ميلليارد تەڭگە تۇسكەنىن ءمالىم ەتتى.

ال بيىل قاڭتاردا جەمقورلاردان تاركىلەنگەن 120 ميلليارد تەڭگە ءبىلىم بەرۋدى قولداۋ قورىنا ءتۇستى. ول تۋرالى پرەمەر- ءمينيستردىڭ ورىنباسارى - قارجى ءمينيسترى ەرۇلان جاماۋبايەۆ مالىمدەگەن ەدى.

اۆتور

داۋلەت ىزتىلەۋ