بۇل تۋرالى عىلىم جانە جوعارى ءبىلىم ءمينيسترى ساياسات نۇربەك ءمالىم ەتتى، دەپ حابارلايدى قازاقپارات ۆەدومستۆونىڭ باسپا ءسوز قىزمەتىنە سىلتەمە جاساپ.
وسىعان دەيىن عالىمداردىڭ جالاقىسى تۇراقتى بولمادى جانە كونكۋرستاردىڭ ناتيجەلەرىنە بايلانىستى ەدى. ەندى ولار گرانتتىق جانە باعدارلامالىق- نىسانالى قارجىلاندىرۋعا ارنالعان كونكۋرستىق راسىمدەرگە قاراماستان تۇراقتى ەڭبەكاقى الاتىن بولادى.
ەنگىزىلىپ جاتقان قارجى رەفورمالارى 1200 گە جۋىق جەتەكشى عالىمنىڭ جالاقىسىن p كە، ياعني 152 مىڭ تەڭگەدەن 257 مىڭ تەڭگەگە دەيىن ۇلعايتۋعا مۇمكىندىك بەرەدى. بۇل شارالار 74 عىلىمي- زەرتتەۋ ينستيتۋتتىڭ كادرلىق جانە عىلىمي الەۋەتىن، وتاندىق عالىمداردىڭ قۇزىرەتىن نىعايتۋعا ىقپال ەتەدى.
«مينيسترلىك زەرتتەۋشى عالىمدارعا قاجەتتى جاعداي جاساۋعا ەرەكشە كوڭىل بولەدى. ۆەدومستۆو عالىم ماماندىعىنىڭ قارجىلىق تۇرعىدان تارتىمدى بولۋى جانە ماڭىزدى عىلىمي يدەيالاردىڭ تۇراقتىلىعى مەن جۇزەگە اسىرىلۋىنا كەپىلدىك بەرۋ ءۇشىن جۇيەلى جۇمىس جۇرگىزىپ جاتىر. مەملەكەت باسشىسىنىڭ تاپسىرماسىن ورىنداۋ اياسىندا ىرگەلى عىلىم مەن زەرتتەۋ ينستيتۋتتارىن بازالىق قارجىلاندىرۋ كولەمىن ۇلعايتۋ ماسەلەسى شەشىلدى. عىلىم تۋرالى زاڭناماعا ءتيىستى وزگەرىستەر ەنگىزىلدى»، - دەپ اتاپ ءوتتى ساياسات نۇربەك.
ايتا كەتسەك، قازىرگى ۋاقىتتا مينيسترلىك 2023-2025 -جىلدارعا ارنالعان عىلىمي جانە عىلىمي- تەحنيكالىق جوبالار بويىنشا گرانتتىق قارجىلاندىرۋعا، ونىڭ ىشىندە جاس عالىمدارعا ارنالعان كونكۋرستار جاريالادى.