سوڭعى بەس جىلدا اتا-اناسى باس تارتقان بوبەكتەر سانى 70 پايىزعا ازايعان
«انالار ءۇيى» جوباسىنىڭ باستى ناتيجەسى - 2013 -جىلدان بەرى پەرزەنتحانادا تۋىپ، اتا- اناسى باس تارتاتىن، وسىدان كەيىن بالالار ۇيىنە تۇسەتىن بالالاردىڭ سانى 68 پايىزعا ازايدى. ەگەر 2013 -جىلى بۇل كورسەتكىش 800 بولسا، قازىرگى ۋاقىتتا 310 بولىپ وتىر»، - دەيدى «انالار ءۇيى» قوعامدىق قورىنىڭ ديرەكتورى باليا اكىمبەكوۆا.
ول بۇل كورسەتكىشكە ۇكىمەتتىك ەمەس ۇيىمداردىڭ ارقاسىندا قول جەتكىزىلگەنىن اتاپ ءوتتى.
«اتا-اناسى باس تارتقان بالالاردىڭ سانى ازايىپ كەلە جاتقانىن بايقادىق. ەڭ الدىمەن، جاس انالارعا وتباسى بولۋعا جەتەر باقىت جوق ەكەنىن بارىنشا ناسيحاتتاعىمىز كەلەدى»، - دەيدى ول.
باليا اكىمبەكوۆانىڭ سوزىنە قاراعاندا، قوردىڭ نەگىزگى مىندەتى - اتا-انالاردىڭ تۋعان بالاسىن پەرزەنتحانادا تاستاپ كەتۋ جاعدايىنىڭ الدىن الۋ.
«دابىل تۇسكەننەن كەيىن ءبىزدىڭ پسيحولوگتار بىردەن سول اناعا بارىپ، جۇمىس جۇرگىزەدى. ەگەر جاس انا بالاسىنان ءبارىبىر باس تارتاتىنىن ايتسا، ءبىز ولارعا «انالار ۇيىندە» تۇرىپ، ءوز بالاسىن ايالاپ ءوسىرۋدى ۇسىنامىز. مىنە، ءدال وسى كەزدە انا ويلانۋى مۇمكىن. ول بالانى كۇندەلىكتى كۇتىپ- باققاننان كەيىن وعان باۋىر باسىپ، جاۋاپكەرشىلىكتى سەزىنەتىن بولادى»، - دەيدى ول.
«انالار ءۇيى» قورىنىڭ ديرەكتورى ناقتى قاي ساناتتاعى ادامدار كەلىپ جاتاتىنىن ايتىپ بەردى.
«ءبىز بۇل رەتتە ارنايى تالداۋ جۇرگىزدىك. «انالار ۇيىنە» بالالار ءۇيىنىڭ بۇرىنعى تاربيەلەنۋشىلەرى، تولىق ەمەس وتباسىندا وسكەن، زورلىق-زومبىلىققا تاپ بولعان بويجەتكەندەر كەلىپ جاتادى»، - دەيدى ول.