الماتىدا «تاريح قاناتىندا» اتتى بالالار سۋرەتى كورمەسىنە 70 تەن استام كارتينا قويىلدى

الماتى. قازاقپارات - بۇگىن الماتىدا «عىلىم ورداسى» رمك كەشەنىنىڭ ارحەولوگيا مۋزەيىندە ق ر تاۋەلسىزدىگىنىڭ 25 جىلدىعىنا ارنالعان «تاريح قاناتىندا» اتتى بالالار سۋرەتى كورمەسى ۇيىمداستىرىلدى.

وعان قالاداعى ءبىرقاتار بەينەلەۋ ونەرى ستۋديالارىنىڭ بولاشاعىنان ءۇمىت كۇتتىرەتىن 5 جاستان 16 جاس ارالىعىنداعى دارىندى جاس سۋرەتشىلەرى قاتىستى. كورمەگە ءار ءتۇرلى جانرداعى 70-تەن استام كارتينا قويىلدى.

«ءبىز ءۇشىن جىل سايىن قانداي دا ءبىر بايقاۋ ۇيىمداستىرۋ داستۇرگە اينالدى. بۇل بايقاۋدى وسىدان ءبىر اي بۇرىن جاريالاعان ەدىك. بۇگىن مىنە، كارتينالار جۇرت نازارىنا ۇسىنىلىپ وتىر. ءبىزدىڭ باستى ماقساتىمىز - وسكەلەڭ ۇرپاقتىڭ بويىندا وتانعا، ەلگە، تۋعان جەرگە دەگەن سۇيىسپەنشىلىك، ماقتانىش سەزىمىن وياتۋ. ولاردى پاتريوتتىق رۋحتا تاربيەلەۋ»، - دەدى «قازاقپارات» تىلشىسىنە بەرگەن سۇحباتىندا ارحەولوگيا مۋزەيىنىڭ مەڭگەرۋشىسى روزا بەكتورەيەۆا.

بۇگىنگى شاراعا جاس اۆتورلار جانە ولاردىڭ پەداگوگتارىمەن قاتار، وسى مۋزەيدىڭ قىزمەتكەرلەرى، كىتاپحاناشىلار، ارحەولوگ، ەتنوگراف عالىمدار قاتىستى.

ولار بالالاردىڭ قازاق حالقى مەن الماتى قالاسىنىڭ تاريحىنا، بۇگىنگى كەلبەتىنە ارناپ سالعان ءار ءتۇرلى جانرداعى كارتينالارىن كورىپ ءتانتى بولدى.

بۇدان كەيىن قاتىسۋشىلار 2015 -جىلى جەلتوقسان ايىندا تولىعىمەن قايتا جاڭارتىلعان ارحەولوگيا مۋزەيىن ارالادى.

كەزىندە بۇل مۇراجايدىڭ 500 دەن استام جادىگەرى استاناداعى ۇلتتىق مۇراجايعا تاپسىرىلعانى بەلگىلى. سوعان قاراماستان، بۇگىندە ارحەولوگيا مۋزەيىنىڭ نەگىزگى كورمە زالىنا 3000 نان استام جادىگەر قويىلعان. ال قويماسىندا 7000 نان استام فراگمەنتارلىق جادىگەرلەر بار. رەستاۆراتورلار ولاردى قالپىنا كەلتىرۋ جۇمىستارىن جۇرگىزىپ جاتىر. بولاشاقتا بۇل جادىگەرلەر دە كورمە زالىنان ورىن الادى.

ايتا كەتەلىك، الداعى 25 -مامىر كۇنى وسى مۋزەي قابىرعاسىندا «تاريح قاناتىندا» بايقاۋىنا قاتىسقان جاس اۆتورلاردىڭ بارلىعىنا گراموتالار، كىتاپتار جانە باسقا دا باعالى سىيلىقتار تابىس ەتىلەتىن بولادى.

اۆتور: ايبوتا جاپپاربەرگەن