سەمەيدە 70 جاستاعى تاكسيشى اجەي جۇرتشىلىقتىڭ ىقىلاسىنا بولەندى - فوتو
بۇل تۋرالى سەمەيدەگى NUR. KZ ءتىلشىسى حابارلايدى.
اياگوز قالاسىنىڭ تۇرعىنى ورازحان اپا بۇگىندە 4 ۇل مەن 1 قىزدىڭ اناسى، 15 بالدىرعاننىڭ اجەسى. ال جارى ارباشى بولىپ جۇمىس ىستەيدى.
ورازحان اپا 30 جىل بويى ساۋدا- ساتتىقپەن اينالىسادى. وسى كاسىپتى دوڭگەلەتىپ جۇرگەندە باسشىسى تۇرلىحان نۇراحمەت ۇلى "زاپاروجەتس" كولىگىن سىيعا تارتقان. بۇل ورازحان اجەيدىڭ ەڭ العاشقى كولىگى بولاتىن.
1984 -جىلى جۇرگىزۋشى كۋالىگىن الىپ، كولىكتى تىزگىندەي باستايدى. اتالمىش كولىك كەيۋاناعا 7 جىل كولەمىندە قىزمەت ەتكەن كورىنەدى. ماشينالارعا اۋەستەنە باستاعان اجەي وسى كۇنگە دەيىن ۆاز 2101, ۆاز 2106, ۆاز 2106, ۆاز 2107, Audi 80, Audi B4, Volkswagen Passat سىندى بىرنەشە ماركالى اۆتوكولىكتەردى اۋىستىرىپ، مىنگەن.
70 تى القىمداپ قالعان اجەيدىڭ قازىرگى تەمىر تۇلپارى - Toyota Camry اۆتوكولىگى. كەيۋانانىڭ ايتۋىنشا، اتالعان كولىكتەردىڭ بارلىعىن قولدان ساتىپ العان ەكەن. ولاردىڭ ىشىندە وزىنە ەڭ قاتتى ۇنايتىنى دا قازىرگى تۇلپارى - Toyota Camry. سەبەبى سالونى جىلى، ءجۇرىسى جايلى كورىنەدى.
اجەي مىنگەن كولىكتەرىن ەسىنە تۇسىرە وتىرىپ، سول كەزدەردە بولعان ەستە قالارلىق وقيعالارىنىڭ ءبىرىن دە باياندادى.
«ناقتى قاي كەز ەكەنىن بىلمەيمىن، كەڭەس وداعىنىڭ باتىرى تالعات بيگەلدينوۆتىڭ جارى ورىندىبيكە بيگەلدينوۆانى ماقانشىعا ناعاشىلارىنا اس بەرۋگە اپارىپ كەلدىم. وبلىس اكىمى بەردىبەك ساپاربايەۆ بولعان كەزدە ارنايى سىيلىقپەن ماراپاتتاپ، اۋدان اكىمى انۋاربەك مۇحتارحانوۆ ماقتاۋ گراموتاسىن تابىس ەتتى. وتىز ەكى جىل كولىك جۇرگىزىپ، تەك ءبىر رەت دوڭگەلەگىن ءوزىم اۋىستىردىم، ونىڭ وزىندە كولىك ىشىندە ايەلدەر بولعان. باسقا ۋاقىتتا دوڭگەلەك اۋىستىرىپ جاتقاندا كوبىسى جۇگىرىپ كەلىپ كومەكتەسىپ جاتادى» ، - دەيدى ورازحان اپا.
كەيۋانا وسى ۋاقىت ارالىعىندا كولىك اپاتىنا ۇشىراپ، نە بولماسا ايىپپۇل تولەپ، قانداي دا ءبىر جول ەرەجەسىن بۇزىپ، كورمەگەنىن ايتادى. سول ءۇشىن جاراتۋشىعا ريزاشىلىعىن بىلدىرەدى. اجەي الىس جولعا شىعاردا مىندەتتى تۇردە اۆتوكولىگىن كۇردەلى جوندەۋدەن وتكىزەدى ەكەن. ويتكەنى، ورازحان اجەيگە ماڭىزدىسى - جولاۋشىلاردىڭ اماندىعى. اجەي ءوز وڭىرىنەن باسقا دا الىس جولدارعا ساپارعا شىعىپ تۇرادى. شىمكەنت، تاراز، سەمەي، تالدىقورعان ولاردىڭ ءبىر بولىگى عانا.
وتىز جىل بەس ۋاقىت نامازىن تاستاماعان اجەي بيىل 13 - قازاندا مەككەگە بارىپ، قاجىلىق پارىزىن دا وتەپ كەلگەن.
«باستىسى امان- ەسەن بارىپ، قايتقانىما شەكسىز ريزامىن. ەلىمە ورالعاندا جانۇيام، اۋدانىمىزدىڭ باس يمامى دۋمان نادير ۇلى باستاعان مەشىت قىزمەتكەرلەرى مەن اۋدان حالقى سالتاناتتى تۇردە قارسى الدى. قانشاما حالىق ۇيگە كەلىپ ءزامزام سۋىن ءىشىپ، قۇران وقىپ تاراستى. بۇل دا جاقسى ادامداردىڭ بار ەكەنى»، - دەيدى ورازحان اپا.
حالىقتىڭ ىقىلاسىنا بولەنگەن اجە قولىنان كەلگەنىنشە مەشىتكە كومەكتەسىپ تۇرادى. سۇيىكتى ءىسى - ەڭبەك ەتۋ. نەمەرەلەرىنە ءارقاشان قولداۋ كورسەتىپ، اقساقالىنىڭ اسىن دايىنداپ، كۇندەلىكتى كولىك جۇرگىزىپ، ادال ەڭبەك ەتىپ، زامانداستارىنا ۇلگى بولۋدا.
بۇگىن دە جۇمىستىڭ قامىمەن جۇرگەن ورازحان اپا: «ەلباسىمىز نۇرسۇلتان نازاربايەۆ تاياۋداعى جولداۋىندا ەرىنبەي ەڭبەك ەتىپ، تالماي ءبىلىم قۋعان، جالىقپاي تەحنيكا يگەرگەن ادامدار جاقسىلىققا جەتەدى دەپ ايتقان. مىنە، ەرىنبەي ەڭبەك ەتىپ، جالىقپاي تەحنيكا يگەرۋدەمىز»، - دەپ ءسوزىن تۇيىندەدى.
دەرەككوز: NUR. KZ