جارمەڭكەدە الماتى وبلىسىنىڭ 16 اۋدانى مەن 3 قالاسىنىڭ، سونداي-اق «جەتىسۋ» الەۋمەتتىك-كاسىپكەرلىك كومپانياسىنىڭ تاۋار وندىرۋشىلەرى شاھار تۇرعىندارىنا 280,3 توننا ساپالى جانە ەكولوگيالىق تازا 70 ءتۇرلى ونىمدەرىن نارىق باعاسىنان تومەنگى باعادا ۇسىندى. اتاپ ايتقاندا، 54,6 توننا ەت، 15,4 توننا بالىق، 25,5 توننا كارتوپ، 76,0 توننا كوكونىس، 29,0 توننا جەمىس-جيدەك، 22,0 توننا ءسۇت جانە ءسۇت، سونداي-اق، وزگە دە ونىمدەر ساتىلدى.
«ەلباسىنىڭ الماتى قالاسىنىڭ ماڭىندا ازىق-تۇلىك بەلدەۋىن قۇرۋ جۇمىستارىن جەتىلدىرۋ جونىندەگى تاپسىرماسىن جۇزەگە اسىرۋ ماقساتىندا العاشقى كۇزگى اۋىل شارۋاشىلىق ونىمدەرىنىڭ جارمەڭكەسىن وتكىزۋدەمىز. ءبىز الماتى قالاسىنىڭ باسشىلىعىمەن ۇنەمى تىعىز قارىم-قاتىناستا جۇمىس جاساۋدامىز. بۇگىنگى جارمەڭكەگە 115 ميلليون تەڭگەنىڭ ءونىمىن الىپ كەلدىك جانە وبلىس اۋداندارىنىڭ مۇنداي جارمەڭكەلەرى اپتا سايىن وتكىزىلەتىن بولادى»، - دەدى ا. باتالوۆ.
وسى ورايدا الماتى قالاسىنىڭ اكىمى باۋىرجان بايبەك جارمەڭكەنىڭ جوعارى دەڭگەيدە ۇيىمداستىرىلعاندىعىنا العىسىن ءبىلدىردى. يگى شارا قالا تۇرعىندارىنا قولجەتىمدى باعادا ساپالى ءارى ەكولوگيالىق تازا ونىمدەردىڭ مول تۇرىنەن تاڭداپ الۋىنا جاعداي جاسادى.
ەستەرىڭىزگە سالا كەتسەك، بۇل جارمەڭكەلەر الماتى ماڭىنداعى ازىق-تۇلىك بەلدەۋىن دامىتۋ جانە حالىقتى قولجەتىمدى باعاداعى وتاندىق ونىمدەرمەن قامتاماسىز ەتۋ ماقساتىندا وتكىزىلۋدە.