ق ر قارۋلى كۇشتەر قاتارىنا 700 گە جۋىق الماتىلىق جاس شاقىرىلادى
بۇل تۋرالى قازاقپارات اگەنتتىگىنىڭ رەسمي ساۋالىنا قورعانىس مينيسترلىگى بەرگەن جاۋاپتا ايتىلدى.
ۆەدومستۆونىڭ مالىمەتىنشە، الماتى قالاسىنىڭ جاس بۋىنى قورعانىس مينيسترلىگى، ۇلتتىق ۇلان، ۇلتتىق قاۋىپسىزدىك كوميتەتى شەكارا قىزمەتىنىڭ جانە توتەنشە جاعدايلار مينيسترلىگىنىڭ اسكەري بولىمدەرىندە قىزمەت وتكەرەتىن بولادى.
اسكەري قىزمەتكە شاقىرۋ كەزىندە ەپيدەمياعا قارسى تالاپتار قولدانىستاعى زاڭناماعا سايكەس ساقتالادى.
بولاشاق ساربازداردى شاقىرۋ جونىندە حاباردار ەتۋ SMS ارقىلى، سونداي-اق ءۇي جانە قىزمەتتىك مەكەنجايلارى بويىنشا جەكە شاقىرۋ قاعازدارىن جولداۋ ارقىلى ىسكە اسىرىلادى.
«ازاماتتاردى اسكەري قىزمەتكە شاقىرۋدى جەرگىلىكتى اتقارۋشى ورگاندار ۇيىمداستىرادى جانە قامتاماسىز ەتەدى. جەرگىلىكتى اتقارۋشى ورگاندار اسكەري باسقارۋ ورگاندارىن جابدىقتالعان اسكەرگە شاقىرۋ (جيىن) پۋنكتەرىمەن، ولاردى كۇتىپ-ۇستاۋدى، ءدارى-دارمەكتەرمەن، كەرەك-جاراقتارمەن، ورتكە قارسى، مەديتسينالىق جانە شارۋاشىلىق مۇلىكپەن، اۆتوموبيل كولىگىمەن، سونداي-اق بايلانىس جانە كۇزەت قۇرالدارىمەن قامتاماسىز ەتەدى. ازاماتتاردى اسكەري قىزمەتكە شاقىرۋ ءۇشىن بەلگىلەنگەن تارتىپپەن اسكەرگە شاقىرۋ كوميسسيالارى قۇرىلادى»، - دەلىنگەن ق ر قورعانىس مينيسترلىگىنىڭ جاۋابىندا.
ءمالىم ەتىلگەندەي، الماتى قالاسىنىڭ قورعانىس ىستەرى جونىندەگى دەپارتامەنتىندە «قارۋلى كۇشتەر - ادالدىق الاڭى» جوبالىق كەڭسەسى (ناۋرىزباي باتىر كوشەسى، 96- ءۇي مەكەنجايى بويىنشا) جۇمىس ىستەيدى.
الماتى قالاسىنداعى كەڭسەگە 87272728648 ءنومىرى ارقىلى حابارلاسىپ، قاجەتتى اقپاراتتى، سۇراقتارعا جاۋاپ الۋعا بولادى.