قىتايلىق دارىگەرلەردىڭ كوروناۆيرۋس تۋرالى ونلاين ساباعىنا قاتىسۋ - تەگىن. بۇل ساباقتار تەك قازاقستاندىق قانا ەمەس، شەتەلدىك مامانداردىڭ دا قىزىعۋشىلىعىن تۋدىرىپ وتىر. بۇگىن سەمينارعا وزبەكستاننان سامارقان مەن بۇحارانىڭ دارىگەرلەرى دە قاتىستى.
«ەڭ الدىمەن وسىنداي كەزدەسۋ تۋرالى ۋاعدالاستىققا قول جەتكىزگەن مەملەكەت باسشىسى قاسىم- جومارت توقايەۆقا العىس ايتامىن. بۇرىن- سوڭدى كورمەگەن ينفەكسيامەن كۇرەستە بۇل مامانداردىڭ كەلۋى ءبىزدىڭ مىندەتتەرىمىزدى ايقىندادى. ەڭ الدىمەن مەديتسينا ماماندارى بۇل ۆيرۋسپەن كۇرەسۋدە ءبىلىمىن كەڭەيتكەنى ءجون. ساباققا قاتىسقان دارىگەرلەردىڭ ساۋالى وتە كوپ. قىتاي بۇل ۆيرۋستى از ۋاقىتتا توقتاتا ءبىلدى. سوندىقتان ولاردىڭ تاجىريبەسى، ءبىلىمى ءبىز ءۇشىن ماڭىزدى» ، - دەدى س. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەتىنىڭ رەكتورى تالعات نۇرعوجين. ساباقتار تەك ەمدەۋ مەن دياگنوستيكا سالاسىنا عانا قاتىستى بولعان جوق.
سونىمەن قاتار، شىڭجاڭ وكرۋگىندەگى دوستىق گوسپيتالىنىڭ اعا مەدبيكەسى يۋ يانسيا ينفەكسيالىق ستاتسيوناردى زاراراسىزداندىرۋ تاسىلدەرىمەن ءبولىستى. «وقشاۋلاۋدىڭ باستى شارتى - «1 ناۋقاس - 1 پالاتا» . ءبىز اۋرۋحانالاردى 3 تيپكە بولدىك. جاسىل - تازا ايماق، سارى - جارتىلاي تازا ايماق، قىزىل - جۇقتىرۋ ايماعى. بۇل ايماقتاردىڭ ءارقايسىسىن وزىنشە تازالايتىنبىز. ورتا ەسەپپەن كۇنىنە 2 رەت زارارسىزداندىراتىنبىز. اۋانى، قابىرعالاردى، ەدەن مەن قۇرال- جابدىقتاردى دەزينفەكتسيالادىق. تولىق زارارسىزداندىرۋعا 30 مينۋت ۋاقىت كەتەدى. دەزينفەكتسيادان شىققان سوڭ بارلىق ماتەريالدار جويىلادى»، - دەدى اعا مەدبيكە يۋ يانسيا. سونىمەن قاتار ول قورعانىس كوستيۋمدەرىن كيۋ، ماسكا تاعۋ، قولدى قالاي جۋۋ كەرەكتىگىن كورسەتتى.
ايتا كەتۋ كەرەك، بۇگىن الماتىعا قىتايدان 10 مامان Covid-19 بەن كۇرەس تۋرالى بىلىمىمەن بولىسۋگە كەلدى. دەلەگاتسيا قۇرامىندا ينفەكتسيونيست، ەپيدەميولوگ، پۋلمونولوگ جانە باسقا دا ماماندار بار.